হায় কোর্ট ওফ মনিপুরদা লৈফম থোকপা জজ মশীঙ শুনা লৈত্রিবা মরম্না হৌজিক কেস কয়ামরুম লোইশিনবা ঙমদনা লৈরে। লৈরিবা জজ মশীঙগা, লাক্লিবা কেস মশীঙগা য়াম্না খেন্নৈ। কেস মশীঙ অসূক্কি মতীক য়াম্না পেন্দিংদা লৈরি। মশীনা মরম ওইরগা লমদম অসীগী জুদিসিয়ারিদা মীয়াম্না থম্লম্বা থাজবগী চাং অসুম অসুম হন্থরক্নবগী অচৌবা মরম অমা ওইরি হায়না মন্ট্রিপুখ্রিদা লৈরিবা হায় কোর্ট ওফ মনিপুরগী কমপ্লেক্স তা পাঙথোকখিবা পাউমীশিংগা উনবগী থৌরমদা হায় কোর্ট বার এসোসিয়েসন মনিপুরগী প্রসিদেন্ট ওইনা লৈরিবা সেনিয়র এদভোকেট নাউরেম কুমারজিৎনা ফোঙদোকখ্রে।
মহাক্না হায়, মনিপুরনা ইন্দিয়াগী ফীবান্নুংদা তিনখ্রবা মতূঙদা মশাগী তোঙানবা হায় কোর্ট অমা লিংননবা এসোসিয়েসন অসীনা তক্নদুনা লাকখিবগী মহয়না ঙসিদি জজ ৫ লৈগদবা হায় কোর্ট অমা লিংবা ঙম্লক্লে। অদূম ওইনমক ঙসীফাওবদা জজ ৫ মক শুনা লৈরক্তবনা কেস মশীঙ য়াম্না পেন্দিংদা লৈরি। হায় কোর্ট অসীগী চিফ জষ্টিস থারগা হৌজিক শুপ্নগী জজ অহুম্না মথৌ তৌদুনা লৈরি। মশীনা মরম ওইরগা কেস অমা লোইশিন্ননবা হোৎনবদা মতম য়াম্না শাংনা চঙলি হায়খি।
মহাক্না মখাতানা হায়, জজ ২ গী অৱাৎপা লৈরিবা অসী মেন্সিনবিবগা লোয়ননা জজ ৭ লৈবা হায় কোর্ট অমা ওইহনবিনবা মরী লৈনবা লো মিনিষ্ট্রি অমসুং মনিপুরগী গভর্নরদসু অইবা চেরোল কয়ারক হন্না পীদুনা তকশীনবসু লৈখ্রে। লৈঙাক্না অথূবদা মীৎয়েং চঙবিদুনা মীয়ামগী খুদোংচাদবশিং অসী কোক্ননবা থৌরাং লৌখৎহন্নিংই হায়না মহাক্না ফোঙদোকখি।
