ইম্ফাল ইষ্ট দিষ্ট্রিক্টকি মনূঙচন্না খূরায় এসেমব্লি কন্সটিট্যূয়েন্সিগী শওম্বুং সাইরেমদা লৈরিবা পি নমজোক্লুন হায় স্কুলদা তম্বা মহৈরোয় ৩১, ঙসিদগী হৌগদৌরিবা ঐচ এস এল সি এগজামিনেসন অসীদা শরুক য়ানবগীদমক ফোর্ম ফিল অপ তৌখ্রবসু স্কুল অথোরিটিনা মখোয়গী রেকোর্দ অমসুং অতৈ পার্টিকুলরশিং বোসেমগী অথোরিটিদা মতম চানা থাগৎপিরমদবদগী পরিখ্যা থাবা ঙমহন্দ্রে, চহী মাঙহনবিরে হায়রি।
মশীগী মতাঙদা খোয়শাওনরবা মহৈরোইশিং অদূগী গার্জিয়ানশিংনা মৈ হৌনা অশাওবা ফোঙদোরকখিবগা লোয়ননা স্কুল অদূদা থোমজিল্লকখ্রে। মহৈরোইশিং অদূগী মনূঙদা ১৬ না নূপীমচাশিংনি অদুগা ১৫ না নূপা মহৈরোইশিংনি হায়রি। মহৈরোইশিং অদূগী এদমিট কার্দ লাক্তবদগী স্কুল অদুদা চত্তুনা হংলুবদা মখোয়গী রিপোর্ট অমসুং দোক্যুমেন্ট অমত্তা থাগৎলমদবা থেংনরকখিবনি হায়না খোয়শাওনরবা মহৈরোইশিং অমসুং মখোয়গী গার্জিয়ানশিং অদুনা ঐখোয়গী পাউমীশিংগা উনখিবা থৌরম অমদা ফোঙদোকখি।
মহৈরোইশিং অদূগী এদমিট কার্দ পীবিনবা মমাঙদগী হৌনা হায়জদুনা লাকখ্রবসু এগজামিনেসন হৌগদবা নোংমা ৱাৎলিঙৈদা পীগনি হায়না স্কুল অদূগী অথোরিটিনা ফোঙদোক্তুনা লাকখিবনি হায়না গার্জিয়ানশিং অদুনা পাউদমখি। ঙরাং স্কুল অথোরিটিদা এদমিট কার্দ পীবিনবা হায়জরুবদা তঙায়ফদবা চে চাং অমসুং ফোর্ম ফিল অপকি শেনফম অমত্তা বোর্দ অথোরিটিদা পীখৎহৌদ্রে হায়না পাউখুম পীরকখিবনি হায়খি।