লৈঙাক্কি ওজাশিংনা প্রাইভেৎ ট্যুসন সেন্টরদা শেল তানবা য়াওরক্লিবসি মরী লৈনবশিংনা অথিংবা পীদ্রবদি মমীং-মথা মীয়ামদা লাউথোক্লগনি:এম এস এফ

মনিপুরদা লৈরিবা গভর্নমেন্ট হায় স্কুল অমসুং হায়র সেকেন্দরি স্কুলশিংদা ওজা ওইনা থবক তৌদুনা তোলোব চারিবা ওজাশিংনা প্রাইভেৎ ট্যুসন সেন্টর অমসুং লন্নাই কোচিং ইন্সটিটিউট শিংদা য়াওশীন্দুনা মশাগী ওইজবখক য়েংদুনা অহেনবা শেল তান্দুনা লৈবা কয়ামরুম য়াওরি।

মশা- মশানা পুরিবা লৈঙাক্কি স্কুল অদুদা মহৈ তম্লিবা মহৈরোয়শিং অদুদা পূক্নীঙ-ৱাখল নীঙথীনা থাধরগা তাকপী-তম্বিবগী মহুত্তা মরন্নাই কান্নবা য়েংলগা থবক তৌরিবা লৈঙাক্কি ওজাশিং অসীগী মথক্তা মরী লৈনবা অথোরিটিনা খূদক্তা মীৎয়েং চঙদুনা, অসীগুম্বা ওজা মানবা, ওজাগী মগুন্দি অমত্তা লৈতবশিং অসী অথিংবা পীবা অমসুং চৈরাক পীদবা তারবদি মনিপুরি ষ্টুডেন্টস ফেদরেসন ( এম এস এফ) না মরী লৈনবা ওজাশিং অদুগী মমীং- মথাগা লোয়ননা মখোয়না থবক তৌরিবা কোচিং সেন্টরশিং অদূগী মমীং, লৈফম্নচিংবা ময়েক শেংনা লাউথোক্তুনা মীয়ামদা খঙহল্লগনি হায়না ফোঙদোকখ্রে। ঙরাং এম এস এফকি ময়ায় লোয়শঙদা পাঙথোকখিবা পাউমীশিংগা উনবগী থৌরমদা ৱাফম অসী মহৈরোয় লূপ অসীগী প্রসিদেন্ট হিজম রোসন্না ফোঙদোকখিবনি।

মহাক্না মখাতানা হায়, মনিপুর লৈঙাক্কি ইদুকেসন (স্কুলস) দিপার্টমেন্টকি মায়কৈদগী হৌখিবা কুমশিং ২০২২ গী ওক্তোবর ১০ থোকখিবা ওর্দর অমগী মতূঙ ইন্না, মাঙজৌননা অশেংবা অমসুং মরম চাবা ষ্টেটমেন্ট লৈঙাক্কি অথোরিটিদা খঙহল্লম্বা তৌদনা লৈঙাক্কি ওজাশিংনা অসীগুম্বা লন্নাই শেন্দাল লম্বীদা চৎলম্বা য়ারোই, মরন্নাই খক্কি য়েংলগা হুরান-কারবার অমত্তা চত্থবা য়ারোই হায়না লাউথোক্তুনা খঙহনবসু লৈখ্রবনি।লৈঙাক্কি ওজাশিংনা মশা- মশানা থবক তৌদুনা তাকপী- তম্বিরিবা স্কুলশিংদা মখোয় মশামক্কি মচা-মশূ অমত্তা লাইরিক তমহন্দ্রিবগী মরম করিগীনো হায়বসি মীয়াম্না খন্থবিয়ু হায়খি।