চহী অসীগী জুলাই ২১ দা, হান্না লৈবাক অসীগী ভাইস প্রেসিডেন্ট ওইনা থৌ পুরম্বা জগদ্বিপ ধঙ্করনা ঈখঙ খঙহৌদনা খূদক্তগী ফম থাদোকখ্রবা মতূঙদা হাঙদুনা লৈহৌরিবা ভাইস প্রেসিডেন্টগী ফম অসীগীদমক নেস্নেল দেমোক্রেটিক এল্লায়েন্স ( এন দি এ) না প্রোজেক্ট তৌরিবা মহারাষ্ট্রগী গভর্নর চন্দ্রপুরম পোন্নুশ্বামি (সি পি) রাধাক্রিষ্ণন্না ঙরাং ন্যু দিল্লিদা প্রাইম মিনিষ্টর নরেন্দ্র মোদিগা উনদুনা ৱাফম কয়ামরুম খন্ন-নৈনখ্রে।
মহাক্না ন্যু দিল্লিদা থুংবদা কিরেন রিজিজু, ভুপেন্দ্র য়াদপ, রাম মোহন নাইদু অমসুং প্রহ্লাদ জোসি- হায়রিবা য়ুনিয়ন মিনিষ্টরশিং অসিনা এয়রপোর্ট তা তরাম্না ওকখি। প্রাইম মিনিষ্টরগা উনখিবা অদুদা মিনিষ্টরশিং অদূসু শরুক য়াখি।
লাক্লিবা সেপ্তেম্বর ৯ দা পাঙথোক্কদৌরিবা ভাইস প্রেসিডেন্ট মীখল অসীগী মীরেপ-চে পীশীনবগী মতাং খন্ননবা এন দি এদা য়াওরিবা পোলিটিকেল পার্টিশিংগী ফ্লোর লিদরশিংগী মীফম অমা ঙসী পাঙথোক্তুনা খন্নগদৌরি।