মৈতৈ ফূরূপকি মীওই অমত্তা লান পামদে। মনিপুরদা হৌজিক মায়োক্নরগা লৈরিবা হীঙশাগী ঈরাঙ অসী কুকিশিংনা কাইহৌরকপদগী থোক্লিবনি, কুকিনা মৈতৈদা খৎনবা হৌরকপদগীনি।কুকিশিংনা মপান লমশিংদগী মখোয়গা জাৎ,লোল অমসুং চৎনবী শাজৎ-লীচৎ মান্নবা মীতোপশিং পুশিল্লক্তুনা মনিপুরগী দেমোগ্ৰাফি অমদি হৌজিক লৈরিবা অপূনবগী শক্তমদা অকায়বা কয়ামরুম পীরক্লিবা অসী তৌগনু হায়না মৈতৈনা হায়জবখক্তনি হায়না থাদৌশিংনা ফোঙদোরক্লি।
মৈতৈদি মনিপুরদা লৈমিন্নরক্লিবা য়েলহৌমীশিং পূন্না হিংমিন্নসি হায়বনি।মদু কুকিশিংগী মায়োক্তা লৈবা ওইবদগী মালেমগী মফম অমত্তদা অরেপ্পা য়ূম্ফম অমত্তা লৈতনা, মতম মতমগী খুদোংচাগদবা য়েংলগা কোয়চৎ চৎতুনা হিংবা কুকিশিংনা মনিপুরদা মখোয়খক্তগী মপাঙ্গল শাগত্তুনা মনিপুরদগী লম লৌশিল্লগা কুকিলেন্দ ওন্থোক্নবা মৈতৈদা খৎনবা হৌরকখিবদগী হীঙশাগী ঈরাঙ অসী থোক্লিবনি হায়না থাদৌ ইনপি মনিপুরগী সেক্রেটরি মাইকেল লমজাথাং হাওকিপ্না ফোঙদোকখ্রে।
থোক্লিবা হীঙশাগী ঈরাঙ অসী লোইশিন্ননবা হোৎনবদা মরূওইবা থৌদাং কয়া লৌদুনা লাক্লিবা থাদৌ কম্যুনিটিগী মীওইশিং ইচম্না শীন্দুনা তরাম্না ওকপগী থৌরম অমদা লমজাথাংনা মহাক্কি ৱাফম অসী ফোঙদোকখিবনি।
ইম্ফাল ইষ্ট দিষ্ট্রিক্টকি খুন্দ্রাকপম কেন্দ্রগী মনূঙচন্না লৈরিবা য়ূম্নাম খূন্নৌদা পাঙথোকখিবা থৌরমদুদা লমজাথাংনা হায়, মতম অমদা থাদৌ কম্যুনিটি অসী মৈতৈশিংনা খোংশাই কৌরম্মী। থাদৌ কাঙলূপ অসী কুকি কাঙলূপকি মীওইনি হায়না মীয়ামদা শন্দোক্তুনা, অতৈ ফূরূপকি মীওইশিংনা লান্না উহন্নবা কুকিশিংনা মতম চূপ্পদা হোৎনদুনা লাকখিবনি। মসীগা লোয়ননা থাদৌ কম্যুনিটিগী হক কয়া নমশীন্দুনা থম্বিরম্মি।
থাদৌদি থাদৌ ওইনা চহী লীশীং অনী হেনবগী পুৱারীগা লোয়ননা মনিপুরদা লৈরক্লবা য়েলহৌমী অমনি অদুগা মনিপুরদা হিংমিন্নরিবা কনাগুম্বা ফূরুপ অমত্তদা কাইহৌরুবসু লৈখিদ্রি হায়খি।
