বি জে পি নত্তনা মনিপুর কনবা ঙমগদবা পোলিটিকেল পার্টি অমত্তা লৈতে:এ সর্দা

মনিপুরদা হৌখিবা কুমশিং ২০২৩ গী মে অহুমদগী হৌরকখিবা মৈতৈ-কুকি কম্যুনিটি অনীগী মরক্তা থোক্লিবা হীঙশাগী ঈরাঙ অসী খূদক্তা লোইশিনবা য়াদবা ফীভম খরা মায়োক্নবদগী হৌজিক লোইশিনবা য়াদনা লৈবনি। অদূম ওইনমক হৌজিক তপ্না-তপ্না ঈরাঙ হন্থরকপা মীয়াম্না উবা ফংলি।লমহেন-তুহেনবা, টেরোরিষ্ট খরনা ঈরাঙ শাগৎনবা কন্না হোৎনরকপদগী হীঙশাগী ঈরাঙ অসী খূদক্তা নেমথহনবদা খুদোংচাদবা খরা থেংনবনি।লৈঙাক্না ঈরাং অসি মপূঙফানা লোইশিন্ননবা থবক পায়খৎলি হায়না বি জে পি মনিপুর প্রদেসকি প্রেসিদেন্ট অধিকারিময়ুম সর্দা না ফোঙদোকখ্রে।
থা খূদিংগী অরোয়বা নোংমাইজিং নুমিৎতা, মীয়ামদা প্রাইম মিনিষ্টর নরেন্দ্র মোদিনা পীবা মন কি বাত থৌরমগী ১৩০ শুবা এদিসন মীয়াম পূন্না তামীন্নবগী থৌরম অমা বি জে পি বিষ্ণুপুর দিষ্ট্রিক্ট মন্দলনা শীন্দুনা পাঙথোকখিবগা লোয়ননা থৌরমদুদা শরুক য়ারদুনা ৱা ঙাঙবদা সর্দানা ৱাফম অসী ফোঙদোকখিবনি। বিষ্ণুপুর কেন্দ্রগী এম এল এ গোবিন্দাস কোন্থৌজম গী সঙ্গাইদা পাঙথোকখিবা মন কি বাত তামিন্নবগী থৌরমদূদা এম এল এ গোবিন্দাস কোন্থৌজমসু শরুক য়াখি।
থৌরমদুদা সর্দা না মখাতানা হায়, মনিপুর কনবা ঙমগদবা পোলিটিকেল পার্টি অমা হায়বা তারবদি বি জে পি খক্তনি। অতৈ পার্টি অমত্তনা মনিপুর কনবা ঙম্লোই। লমদম অসিগী য়েলহৌমী কন্ননবগীদমক সেন্তর লৈঙাক্না আই এল পি চৎনহনখি। বোর্দর ফেন্সীংগী থবক পায়খৎলক্লি হায়খি।
মনিপুরগী ঈরাং অসি ধর্মগী ওইবা মায়োন অমদা লাকখিবদগী ভিক্সিট ভারত হায়বদুদা মীৎয়েং থম্লগা সেন্তরনা খূদক্তা ক্রকদাওন তৌবা য়াদবা ফীভম খরদগী তাঞ্জা অমা য়েংদুনা তুমিন্না লৈবনি। ৱাথোক অসি লোইশিন্নবা হোৎনবদি লেপত্রি। য়াম্না থুনা ৱারোয়শিন পুরক্লগনি হায়বগী থাজবা লৈরে হায়না এম এল এ গোবিন্দাসনা থৌরমদুদা ফোঙদোকখি।