কোংবা মরূ লাইফমদা লাই খুরুমলিঙৈদা কুকি মিলিটেন্টশিংনা নোংমৈ রাউন্দ ১০ রোম কাপথরকখ্রে, চেন্নবা মরি ফারে

হীন্দূ লাইনিং চৎলিবা মৈতৈ ফূরূপকি য়াম্না মরুওইবা লাইফম্লেল অমা ওইরিবা, ইম্ফাল ইষ্ট দিষ্ট্রিক্টকি শগোলমাঙ পুলিস ষ্টেসনগী মনূঙচন্না লৈরিবা কোংবা মরু (কোংমরু) লাইফম্লেন্দা ঙরাং অয়ূক লাই কম্মিটিনা লুচিংদুনা মফম অদোমগী খুঞ্জাশিংনা লমদা থাগী নোংমা পানবা নুমিৎকা মরী লৈননা লাইনীং-লাইসোনগী, পুজাগী থৌরম পাঙথোক্লিঙৈ চৈরক্তা চীঙথক্তগী কুকি মিলিটেন্টশিংনা নোংমৈ রাউন্দ তরারোম হেন্না কাপশীল্লক্তুনা অকায়- অতোয়, অকী-অখঙ থোকহনখ্রে। নোংমৈ কাপথরকখিবা অদুদা মীয়ামদুগী মরক্তা অশোক- অপন য়াওখিদ্রবসু কা হেন্না মিপাইবা পোক্তুনা চেকশীন থৌরাংশিং লৌখৎখি। অদূম ওইনমক সেক্যুরিটিগী অকনবা চেকশীন-থৌরাংগা লোয়ননা মীয়াম্না লাইগী থৌরমশিংদি মপূঙফানা পাঙথোকখি।

লাই খুরুম্বগী থৌরম অদূ ইম্ফাল ইষ্ট দিষ্ট্রিক্ট পুলিসকি এদ্দিস্নেল এস পি (ওপ্স)  অমসুং এদ্দিস্নেল এস পি (এল ও) না লুচিংবা মনিপুর পুলিস টিম অমসুং সি আর পি এফ পার্সনেলশিংনা ঙাক-শেন্দুনা পাঙথোকখি। কুকি মিলিটেন্টশিংনা নোংমৈ কাপথরকখিবা থৌওংদু য়ানিংদবা ফোঙদোক্তুনা মৈরা পায়বী ঈমাশিংনা ঈশিখা পুলিস আউটপোষ্ট মমাঙদা অকনবা প্রোটেষ্ট তৌখি। নোংমৈ কাপথরকখিবা থৌদোক্তুদা চেন্নবনি হায়বা কে এন এফ (পি) গী কাদর ৪সেক্যুরিটি ফোর্স না ওপরেসন চত্থবদা ফাগৎপা ঙমখ্রে হায়রি।

মখোয়শিং অদূদি লুঙৌশেম কিপগেন (২৯) অপোকপা সৈখোহাও কিপগেন, লৈফম্না ফাইজোল ভিল্লেজ-কাংচুপ, লেটমিনলাল কিপগেন (২৫) লৈফম্না ইভেনেজর ভিল্লেজ, সাটমিনলুন তুইবোই (২৪) অপোকপা লেটমাং তুইবোই ওফ চালবুং ভিল্লেজ অমসুং থাঙ্গৌলুন কিল্লোং (২৭) অপোকপা সোনখোথাং কিল্লোং ওফ লুৱাংশঙ্গোল ভিল্লেজ হায়রিবশিং অসিনি। কাংপোকপী দিষ্ট্রিক্ট পুলিসকি এস পি গী মীৎয়েং মখাদা দিষ্ট্রিক্ট পুলিসকি টিমনা ১১৫ শুবা সি আর পি এফ কা খূৎশম্নরগা সর্স ওপরেসন চত্থবদা মখোয় মরিদু ফাগৎপা ঙমখিবনি হায়রি।