কোকোমিগী সিভিল দিসওবিদেন্স মূভমেন্টগী খোঙজঙ হেন্না কনশীনখ্রে, পুলিসকা মূক্নবদা মীওই কয়ামরুম শোক্তুনা হোস্পিটালদা য়ৌনখ্রে

মরীশুবা মহার রেজিমেন্টকি টিম অমনা হন্দক থা অসীগী ২০ দা সেনাপটি দিষ্ট্রিক্টকি গ্বালতাবিদা পাউমিশিং তোংদুনা সিরুই ফেষ্টিবেলগী পাউ কভর তৌননবগীদমক মনিপুর ষ্টেট ট্রান্সপোর্ট কি বস অমদা চৎখিবা খোঙচত্তা বস অদুদা মনিপুর হায়না থারিবা ময়েকশিংদু লৌথোকউ হায়রকপগা লোয়ননা খোঙচৎ অদূদা অথীংবা পীরকখিবা থৌদোক অদূগী দাইত্য গভর্নরনা পুবগা লোয়ননা মহাক্না মনিপুরগী মীয়ামদা এপোলোজাইজ তৌগদবনি হায়বা দাবী তৌদুনা মীয়াম্না ঙরাং মায়কৈ কয়াদগী থোমজীন্নরকখ্রে।

কো-ওর্দিনেটিং কম্মিটি ওন মনিপুর ইন্টিগ্ৰিটি (কোকোমি) থা অসীগী ২৪ দা মাঙজৌননা লাউথোক্লদুনা, থৌদোক অদূগী দাইত্য গভর্নরনা পুবগা লোয়ননা মীয়ামদা লাল্লে হায়জরক্ট্রবদি সিভিল দিস ওবিদেন্স মূভমেন্টগী হেন্না অকনবা খোঙজঙ ঙরাং অয়ূক্তগী হৌরগা চত্থরগনি হায়না লাউথোকখ্রবনি। খ্বাইরম্বন্দ কৈথেল ফম্বী মশীঙ য়াম্লবা ঈমাশিং, তোঙান-তোঙানবা মায়কৈ কয়াদগী লাকখিবা মৈরা পায়বী ঈমাশিংনা রাজ ভবন তম্না থোমজীন্ননবা বি টি রোদতা লৈবা কংগ্রেস ভবনগী মপা য়ৌরকপদা রেপিদ এক্সন ফোর্স কাঙবূ অমসুং পুলিস অমদি অতৈ সেন্ট্রেল ফোর্স কয়ানা থত্তুনা চঙহন্দনবা হোৎনরকপদা চাউনা মূক্নরকখি।

মীয়ামদু তকথোক্ননবা পুলিসনা ট্যার গ্যাস সেলশিং অমসুং স্মোক বোম কয়া কাপখি। থৌদোক্তুদা ঈমা খোঙজঙলোয় কয়ামরুম অশোক- অপন নংদুনা হোস্পিটালাইজ তৌখি। মমৈথঙদা পুলিস অমসুং সেক্যুরিটি ফোর্স না মীয়ামদু কন্ট্রোল তৌদুনা তকথোকপা ঙমখি। মনিপুরগী চিফ সেক্রেটরি, দিজিপি অমসুং সেক্যুরিটি এদভাইজর অহুম্মক রিজাইন তৌগদবনি, গভর্নরনা মনিপুরগী মীয়ামদা লাল্লে হায়জগদবনি হায়বা দাবী অসী মখাতানা কন্সীল্লগনি হায়রি।