কোকোমিনা কৌখিবা পূঙ ৪৮ গী জেনরেল ষ্ট্রাইক্না মীয়ামগী মহৌশাগী পুন্সিদা চাউনা অপনবা পীখ্রে

চৎলিবা মে থা অসীগী ২০ দা সিরুই লিলি ফেষ্টিভেল হৌদোকখিবা থৌরমগী পাউ কভর তৌননবা মনিপুর ষ্টেট ট্রান্সপোর্ট (এম এস টি) গী বস অমদা তোংলগা চৎখিবা পাউমীশিংগী টিম অমবু গ্বালতাবি য়ৌরকপদা, মফম অদুদা লৈরম্বা মরিশুবা মহার রেজিমেন্টকি কাঙবূ অমনা বস অদূ খাম্লবা মতূঙদা মনিপুর হায়না থারিবা ময়েক অদূ মূত্থৎত্রবদি চৎখিবা য়ারোই, সেক্যুরিটি এদভাইজরগী ওর্দরনি হায়না অথীংবা পীরকখিবা থৌওং অদূগী মায়োক্তা কন্না য়ানীংদবা ফোঙদোক্তুনা কো-ওর্দিনেটিং কম্মিটি ওন মনিপুর ইন্টিগ্ৰিটি (কোকোমি) না মনিপুর পূম্বদা কৌখিবা পূঙ ৪৮ গী জেনরেল ষ্ট্রাইক্না মীয়ামগী মহৌশাগী পুন্সিদা চাউনা অপনবা পীখ্রে।

থৌদোক অদূগী তেকচাক মনিপুরগী সেক্যুরিটি এদভাইজর, চিফ সেক্রেটরি অমসুং দি জি পিনা পুগদবনি লোয়ননা মখোয় অহুম্মক ফমদগী খূদক্তা রিজাইন তৌগদবনি হায়বা দিমান্দ তকশীন্দুনা কোকোমিনা পূঙ ৪৮ গী জেনরেল ষ্ট্রাইক অদূ কৌখিবনি। নীনী চনবা নুমিত্তা ঙরাং মীয়াম লম্বীদা থোক্নরক্তুনা হেন্না কনশীনবা খোঙজঙ চঙশীনখি। লম্বী ময়ায়দা মীয়াম অমদি মৈরা পায়বী ঈমাশিংনা উ-ৱা , টয়ারনচিংবা ফৈজিন্দুনা মৈ থাখি। অচৎ- অওকশিং থিংখি। লম্বীদা লাকপা সেন্ট্রেল সেক্যুরিটি ফোর্স কি গারিশিং খামদুনা মখোঙনা কূমথহল্লগা চৎহনখি।

কোকোমিগী জেনরেল ষ্ট্রাইক শৌগত্তুনা মোইরাংখোম শৌগাইজম লৈকায়দা মৈরা পায়বী ঈমাশিংনা ৱাকৎ মীফম চত্থখি। লমজাউ ময়ায় লৈকায়দসু মায়কৈ অদূগী মীয়াম্না ৱাকৎ মীফম পাঙথোকখি। গ্বালতাবিদা ইন্দিয়ান মিলিটরিনা চত্থখিবা থৌওং য়ানিংদে হায়বা খোল্লাউশিংনা নিনখি।