মমাঙগী চহী ২০২৪ গী দিসেম্বর থাগী ১৪ দা থৌবাল দিষ্ট্রিক্টকি শল্লুংফম স্কুল মনাক্তা মনিপুর পুলিশ কম্মান্দো খূৎপূ অমনা নোংমৈনা কাপ্পদা খুল ঙাকপা ভিল্লেজ ভলন্টিয়র ফোর্স অমা শিখিবা অদুগা ভলন্টিয়র ৬ না ফাজীন্দুনা থমজিনলিবা অসীগী মায়োক্তা মৈরা পায়বীশিংনা অকনবা মওংদা, মনিপুর তম্পাক্কি মৈতৈ তারিবা মফমশিংদা পাক- সন্না প্রোটেষ্ট তৌদুনা লাক্লি। মসিগী মখা তারকপা শরুক অমা ওইনা ঙরাংসু ইম্ফাল- ইষ্ট দিষ্ট্রিক্ট কি বাশিখোং বজারদা ঈমা মৈরা পায়বীশিংনা অকনবা খোঙজঙ চঙশিনখি।
বাশিখোং পান্থোইবি অপূনবা মৈরা পায়বী লূপ্না শীন্দুনা খুলঙাকপা হাৎপা, ফাবা য়ানিংদে, কুকি- মিলিটেন্টশিং দা থৌনা ঊৎপদি ঙমদ্রগা মীয়ামগী পুন্সি অমসুং লন- থুম ঙাক্লিবা ভিল্লেজ ভলন্টিয়র ফোর্স ঈচাশিংদা ওন্সিল্লগা মথৌনা ফূদোক্তুনা খুলঙাকপশিং হাৎপা, ফাবগী থবক চত্থরিবা পুলিশ কম্মান্দো খূৎপূ অদূ খূদক্তা দিসমিস তৌবগী মথক্তা মতিকচাবা আইনগী চৈরাক ফংহনগদবনি হায়বা খোল্লাউশিংগা লোয়ননা প্রোটেষ্ট তৌখিবনি।
বাশিখোং পান্থোইবি অপূনবা মৈরা পায়বী লূপ্না শীন্দুনা খুলঙাকপা ফাবা, হাৎপা য়ানিংদে হায়দুনা চঙশীনখিবা খোঙজঙ অদুদা লূপ অদূগী লুচিংবী অথোকপম বিমোলানা ফোঙদোকখিবা অমদা, কুকি- মিলিটেন্টশিং না মমাঙ চহী ২০২৩ গী মে অহুমদগী মৈতৈ ফূরূপকি মথক্তা লান্দারক্তুনা মীওই কয়া শিহল্লিবা অদুগা কয়া অমনা শোকহনখ্রবা লোয়ননা মীওই লীশিং হুম্ফু হেন্না রিলিফ কেম্পতা চঙজফম লৌদুনা লৈহল্লিবা অসীদা মনিপুর পুলিসনা কুকি- মীলিটেন্ট অমফাওবা ফাবা, হাৎপা ঙমদে। খুলঙাকপা ঈচাশিং অসী লৈরমদ্রবদি ঐখোয় করি ওইমগনি হায়খি।