খোয়শাওনরবা কুকি মীয়াম হৌরক্তুনা কে এন ও লিদর কেলভিনগী ময়ূম মৈ থাদোকখ্রে

হৌখিবা সেপ্তেম্বর ৪ দা সেন্টর লৈঙাক অমসুং কুকি-জো কাঙলূপকি লূপশিংগগী মরক্তা, মরু ওইনা সস্পেন্সন ওফ ওপরেসন (সূ) খূৎয়েক পীনদুনা লৈরিবা কে এন ও গী মরক্তা মখাতানা সূ এক্সটেন্সনগী এগরিমেন্ট সাইন তৌনখিবা অদূদা নেস্নেল হায়ৱে নম্বর-২ দা কুকি-জো ফূরূপনা মতম শাংনা থম্লকখিবা ব্লোকেদ হাংদোক্তুনা ফ্রী মূভমেন্ট চৎনহন্নবা য়াহনখি হায়বগী মতাংদা কুকি-জো মীয়াম্না য়ানিংদবা ফোঙদোক্তুনা হীঙশা য়াওবা অকনবা খোঙজঙশিং ঙসীসু হেন্না কন্সীনবা মওংদা চত্থরক্লি।

খোঙজঙ অসীগী মখা তারকপদা থা অসীগী ১৪ গী নুংদাংৱাইরমদসু মশীঙ য়াম্লবা কুকি-জো মীয়াম হৌরক্তুনা কুকি নেস্নেল ওরগনাইজেসন (কে এন ও)গী লুচিংবা কেলভিন আইকেন্থাংগী ময়ূম তুম্না মৈ থাদোকখ্রে অদূগা কুকি- জো কাউন্সিল অমসুং ইন্দিজিনস ট্রাইবেল লিদর্স ফোরমগী স্পোক্সপর্সন ওইনা থৌ পুরিবা গিঞ্জা ভুৱালজোংগী ময়ূমসু এত্তেক তৌদুনা মৈ থাননবা হোৎরকপদা মফম অদূগী মীয়াম্না অথীংবা পীবদগী ভূৱালজোংগী য়ূম অদূদি মৈ চাকহৌদ্রে।

কেলভিন আইকেন্থাং অসী হৌজিক কে এন ওগী এক্সপর্নেল এফ্যের্স সেক্রেটরি ওইনা লৈরিবনি।
সেপ্তেম্বর ১৩ দা চুরাচান্দপুর দা প্রাইম মিনিষ্টর নরেন্দ্র মোদি লাক্তুনা মীয়ামদা ৱা ঙাঙখিবা অদূসু মায় পাকহন্দননবা কুকি- জো মীয়াম্না য়ৈখায়- থিঙ্গাইবগী থৌওংশিং চত্থখিবনি। থৌদোক অদূদা চেন্নবনি হায়বা নহা অনী পুলিসনা ফাজিনখিবদগী ঙসীফাওবা থাদোক্তনা লৈরি।চৈরকসিদা, কুকি-জো কাউন্সিলনা এন ঐচ-২ দা লম্বী থিংবগী খোঙজঙ হন্দোকপা অমসুং ফ্রী মূভমেন্ট চৎনহনবগী ৱাফম অমত্তা লৈতে হায়না ফোঙদোরক্লি।