করম্বা মতমদা মনিপুরদা মীয়ামগী লৈঙাক অমা শেম্লক্কদগে হায়বদু তম্বা ঙমদ্রি: সৈত্যবর্তা

মনিপুরদা হৌজিক লৈরিবা রাজনীতিগী তঙদূ-লৈতাদবা ফীভম, লো এন্দ ওর্দরগী মওং-মতৌ ময়ামসি কূপ্না য়েংলুরগা করম্বা মতমদা মীয়ামগী লৈঙাক অমা শেম্লক্কদগে হায়বদু তম্বা ঙমদ্রি হায়না য়াইস্কুল কেন্দ্রগী এম এল এসু ওইরিবা মনিপুর লেজিসলেটিব এসেমব্লিগী স্পিকর টি ঐচ সৈত্যবর্তা না ফোঙদোরকখ্রে। য়াম্না অথূবা মতমদা ষ্টেট অসীদা হৌজিক থম্লিবা প্রসিদেন্ট রুল অসী লৌথোকখ্রগা মীয়ামগী পোপ্যুলর গভর্নমেন্ট অমা শেম্লক্লগনি, মদূগীদমক বি জে পি অমসুং মসিগা চৎমীন্নরিবা পার্টিশিংগী এম এল এ শিংনা সেন্টরগী লুচিংবশিং অমসুং মনিপুরগী গভর্নরগা কয়ারক উনদুনা লৈখাই তানা ৱারী- ৱাতায় শান্নবগী থবক চত্থবসু লোইরে হায়না য়াম্না মখৌ পোঙনা লাউরম্বা স্পিকর অসীনা মনিপুরদা করম্বা মতমদা মীয়ামগী লৈঙাক অমা শেম্লক্কদগে হায়বদু তম্বা ঙমদ্রি হায়না ঙরাং ঈরায় লায়না পাউমীশিংদা ফোঙদোরকখিবনি।

য়াইস্কুল হিরুহনবা লৈকায়দা নৌনা শাবা শ্রীশ্রী গোপিনাথ মান্দপ শঙ্গাবগী থৌরম শরুক য়াননবা লাকখিবগী সাইদলাইন দা মহাক্না ৱাফম অসী পাউমীশিংদা ফোঙদোক্লম্বনি। মহাক্কি ওইনদি হৌজিক লৈরিবা ফীভম অসীদা করি তৌগদবনো হায়বফাও খঙদ্রে, উপাই লৈত্রে, ইচম চম্না ষ্টেট লেজিসলেটিভ এসেমব্লিগী থোঙ শঙনবা লৈরিবা হায়বদু তারে অদুগা মনিপুরদা হৌজিক কনা-কনানা লুচিংবা ওইরিবগে হায়বসু খঙদ্রে, মানা মানা অনীংবা অপাম্বগী মখাদা থবক তৌনরকপগী থাক্তা লৈরে হায়না স্পিকর অসীনা নুংনাংবা ফোঙদোকখি।

মনিপুরদা হৌজিক লৈরিবা পি আর অসীগী অরোয়বা মতম অমদি লাক্লগদবা মরম্না মতম খরগী মনূঙদা অহোংবা অমদি মীয়াম্না উবা ফংলক্লগনি হায়না মহাক্না মশাগী ওইবা মোৎ ফোঙদোরকখি। মান্দপ শঙ্গাবগী থৌরমদুদা য়াইস্কুল নহারোল শীঙলূপ মরুপকি প্রসিদেন্ট আসেম অমুবা, সেক্রেটরি লাইশ্রম প্রদিপ অমসুং মনিপুর ষ্টেট কালা একাদেমিগী এৱার্দি অচোম তম্ফা শরুক য়াখি।