ইম্ফাল সেপ্তেম্বর ০৮: জাপানগী প্রাইম মিনিষ্টর সিগেরু ইসিবা ফম থাদোক্লে হায়না ঙরাং য়াম্না থাজরুদবা মওংদা লাউথোরকখ্রে। জাপানিজ পারলিয়ামেন্টকি মীখলদা হন্দক মাইনোরিটি তারদুনা য়াম্না শাথীনা নীঙবা কায়খ্রবা মতূঙদা মহাক্না ফম থাদোকপগী ৱাফম অদূ লাউথোরকখিবনি হায়রি।
হন্দক্কি জাপানিজ পারলিয়ামেন্ট কি অপ্পর হাওসকি মীখলদা সিগেরু গী চূঙশীন্নবা পার্টিনা মাইনোরিটি তাখিবদগী প্রাইম মিনিষ্টর সিগেরু ইসিবা য়াম্না শাথীনা নীঙবা কায়হৌখি। মমাঙ চহীদা পাঙথোকখিবা জাপানিজ পারলিয়ামেন্টকি লাৱর হাওসকি মীখলদসু প্রাইম মিনিষ্টর অসীগী চূঙশীন্নবা লৈঙাক্না মাইনোরিটি তাদুনা মায়থীবা ফংহৌখিবনি।
ক্যোদো ন্যুজ এজেন্সিগী রিপোর্ট অমগী মতূঙ ইন্না, সিগেরুগী লৈঙাক্না হাওস অনীমক্তা মাইনোরিটি তাখ্রবসু লৈবাক অদূদা পোলিটিকেলগী ওইনা চরাঙনবা থোক্তনবগীদমক মতম খরা সিগেরুনা প্রাইম মিনিষ্টর ওইনা থৌ পুদুনা লৈখিগনি হায়রক্লি।