ইন্দো-ম্যান্মার ঙমখৈদা লৈবাক অনীমক্কি লমখৈদা কিলোমিটর ১০/১০ চঙথোক চঙশীন তৌবদা নৌনা অমূক য়াহনখ্রে

মমাঙগী মতমশিংদা ম্যান্মার অমসুং ইন্দিয়া অনী তাইনরিবা ঙমখৈ মনাক্তা লৈরিবা লৈবাক অনীমক্কি লম শরুক্তা কিলোমিটর ১৬/১৬ ফাওবা চঙশীন্দুনা লৈবা য়াবগী অয়াবা পীদুনা ফ্রী মূভমেন্ট রিজিম ( এফ এম আর) চৎনহল্লম্বা অদু মতম খরগী মমাঙদা য়ুনিয়ন হোম মিনিষ্ট্রিনা হন্দোকখিদুনা চঙথোক-চঙশিন তৌবা অমত্তা য়াহল্লুদ্রবা মতূংদা অঙকপা মওংদা হোম মিনিষ্ট্রি অসীমক্না অনৌবা ওর্দর অমা অমুক হৌজিক থোক্লক্তুনা ইন্দিয়া অমসুং ম্যান্মার অনী তাইনরিবা ঙমখৈ শরুক্তগী কিলোমিটর ১০/১০ চঙথোক-চঙশীন তৌনবা য়াহনখ্রে।

মনিপুরদা হৌখিবা কুমশিং ২০২৩ গী মে অহুমদগী, ম্যান্মার দগী চঙশীল্লকপা খূৎলায় পায়বা পি দি এফ, কে এন এ নচিংবা মিলিটেন্টশিং শরুক য়াদুনা মৈতৈ কম্যুনিটিগী মথক্তা ঙসীফাওবা অকনবা এত্তেক চত্থরকপদগী মীশী-মীনা, অশোক- অপন কয়া মায়োক্নহন্দুনা লৈবা অমসুং মীওই লীশীং কয়াগী য়ূম মৈ থাদোকখিবদগী লাঞ্জেন্নদুনা রিলিফ কেম্পশিংদা ঙসীফাওবা মীয়াম্না অৱাবা খাঙদুনা লৈবদগী ইন্দো- ম্যান্মার বোর্দর পরীং শম্বল খাজিনবগী থবক য়াম্না কন্না চত্থদুনা লৈরিঙৈ চৈরকশিদা মরম অমত্তা ষ্টেট লৈঙাক্তা অমদি মনিপুরগী মীয়াম অসীদা পীদুনা খঙহল্লম্বা তৌদনা সেন্টরগী হোম মিনিষ্ট্রিনা ইখঙ খঙহৌদনা লৌরক্লিবা খোঙথাঙ অসীদা মনিপুরগী মীয়াম অঙকপা অমসুং খোয়শাওনবা ফাওনরি।

ঙমখৈ ঙাক্লিবা আসাম রাইফলসতগী বোর্দর পাস লৌরগা চঙথোক চঙশীন তৌহনগনিসু হায়রি। হীরম অসীগা মরী লৈননা এক্সিট এন্ট্রি পোইন্ট নিপান হাংদোকখ্রে। মখাতানা অসীগুম্বা পোইন্ট ৩৫ সু তাঙ্কক অনিরক থোক্না অথূবদা হাংদোক্লগনি হায়রি।