খুলঙাকপা হাৎখিবা, ফাজিনখিবগী মায়োক্তা কৌখিবা টুটেল সটদাউন্না মহৌশাগী পুন্সিদা চাউনা অকায়বা থোকহনখ্রে

চৎলিবা দিসেম্বর থা অসীগী হৌখিবা তাং ১৪ দা থৌবাল দিষ্ট্রিক্ট কি হৈরোক পুলিশ ষ্টেসন মনূংচন্না লৈরিবা সলূংফমদা মনিপুর পুলিশ কম্মান্দো শিংনা নোংমৈনা কাপ্তুনা হাৎখিবা, মীয়াম্নদি ভিল্লেজ ভল্লন্টিয়রনি হায়বা লাইশ্রম প্রেম হাৎখিবা থৌদোক, অদুগা অতোপ্পা ভিল্লেজ ভল্লন্টিয়রনি হায়বা মীওই ৬ ফাজিনখিবগী থৌওং অদুবু খম থেংনা য়ানিংদবা ফোঙদোকপগা লোয়ননা মরাল লৈবা পুলিশ কম্মান্দোশিংগী মথক্তা অকনবা এক্সন লৌখৎলু, মী হাৎপা পুলিশ কম্মান্দো খূদক্তা টার্মিনেট তৌগদবনি হায়বা দিমান্দগা লোয়ননা ফাজিনখিবা ভিল্লেজ ভল্লন্টিয়র তরুক কন্দিসন অমত্তা য়াওদনা খূদক্তা থাদোক্কদবনি হায়বা দাবী তৌদুনা থৌদোক অসীগী মতাংদা শেমখিবা জে এ সিনা কৌখিবা টুটেল সটদাউন্না মনিপুর তম্পাক্কি মফম পূম্নমক্তা মীয়ামগী মহৌশাগী পুন্সিদা চাউনা অকায়বা থোকহনখ্রে।

জে এ সি এগেন্স দি কিল্লিং এন্দ এরেষ্ট ওফ সিক্স ইন্নোসেন্ট ভিল্লেজ ভল্লন্টিয়র্স না মনিপুর পূম্বদা থা অসীগী ২৭ কি নুমিদাংৱাইরম পূং ৬ তগী মথংগী নুমীৎ দিসেম্বর ২৮ গী নুমিদাংৱাইরম পূং ৬ ফাওবা, পূং ২৪ গী টুটেল সটদাউন চত্থখিবা অদুনা মীয়ামগী মহৌশাগী পুন্সিদা চাউনা অকায়বা থোকহনখ্রে। ইম্ফালদা খ্বাইরম্বন্দ কৈথেল য়াওনা মনিপুর তম্পাক্কি দিষ্ট্রিক্ট শিংদা লৈরিবা কৈথেলশিং, বিজিনেস ইষ্টাব্লিসমেন্ট, স্কুল-কল্লেজ, দুকান্নচিংবা ঙম্নমক থোঙ হাংনখিদ্রে।

লৈঙাক্কি ওফীসশিংদা ইমপ্লোয়িশিং লাকপগী চাং য়াম্না নেম্না লৈখিবগা লোয়ননা সটদাওন শৌগৎপা মশীং য়াম্লবা মীয়াম্না লম্বীদা থোক্লক্তুনা গারিশিং থিংদুনা চত্থোক-চৎশীন তৌবা য়াহনখিদে।