ইন্দিয়া লৈঙাক্কা মরী লৈনবা থবক-থৌরম পূম্নমক খূদক্তগী কোকোমিনা অথীংবা থম্লগনি হায়না লাউথোকখ্রে

চিন- কুকি- নার্কো- টেরোরিষ্টশিং লমদম অসিদগী অমত্তা চীত্থদনা তকথোকখিননবা লৈঙাক অসিদা য়াওরিবা মি নিষ্টর, এম এল এ শিংনা লাক্লিবা পূং ২৪ অসীগী মনূংদা চপচাবা ফিরেপ অমা লৌগদবনি। সূ দা লৈরিবা কুকি- মিলিটেন্ট শিং মিলিটরি ক্রেকদাওন চত্থদুনা অমত্তা খাক্তনা তকথোকখিগদবনি। মসী লৈঙাক্না থবক্তা ওন্থোরক্ট্রবদি লৈঙাক্কি মথক্তা মীয়াম্না চান্নৈ- চূনৈ হায়না খনবা খোঙজঙ চঙশীন্ননবা শেম- শাদুনা লৈরে হায়না কোর্দিনেটিং কম্মিটি ওন মনিপুর ইন্টিগরিটি ( কোকোমি) গী লুচিংবা খূরায়জম অথৌবনা ফোঙদোকখ্রে।

খ্বাইরম্বন্দ ঈমা কৈথেলদা কোকোমিগী থৌমীশিংনা মীয়ামগা পূন্দুনা অকনবা প্রোটেষ্ট চত্থদুনা, হন্দক নবেম্বর ১১ দা কুকি- চিন- নার্কো- টেরোরিষ্ট শিংনা ফাখ্রগা মীহাৎ থীনা হাৎখিবা মীওই তরুক্কি মতাঙদা অকনবা মওংদা পেন্দবা ফোঙদোকখিবা অমগা মরী লৈননা মহাক্না ৱাফম অসী পাউমীশিংদা ফোঙদোরকখিবনি। নবেম্বর ১১দা চিন কুকি মিলিটেন্টশিংনা মশা-মশাগী য়ূমদগী ফাদুনা পুখিবা মীওইশিংদু সূপ্নগী থা ৮ খক্তা ঙায়রিবা অঙাঙ অমা য়াওনা পীক্লিবা অঙাঙ অহুম অমসুং নূপী অহুম- পূন্না মীওই তরূক্নি। থা অসীগী ১৫ দা মখোয় তরুকমক কুকি মিলিটেন্ট শিংনা খ্বায়দগী হেন্না তমথীনা, মিনুংশি য়াওদবা মীহাত্তা হাৎপীরবা মতূংদা হুন্দোক্লম্বনি। মখোয় তরুক জিরিবাম দিষ্ট্রিক্টকি বোরোবেক্রা পুলিস ষ্টেসন্না কোনবা জাকুরাধোর খুঙ্গংদগীনি।

ইন্দিয়া লৈঙাক্না কুকি মিলিটেন্টশিং তকথোকপা ঙমদ্রিফাওবা মনিপুরদা ইন্দিয়া লৈঙাক্কা মরী লৈনবা থবক-থৌরম পূম্নমক অথীংবা থম্লগনি হায়নসু মহাক্না লাউথোকখি। কুকি টেরোরিষ্টশিংনা ঐখোয়গী মরাল লৈজদ্রবা নূপী-অঙাঙশিং ফাদুনা হাৎলগা ইন্দিয়া লৈঙাক্না মরম চাদনা আফস্পা থমজিনবগী থৌওং চত্থরক্লিবসি কুকি মিলিটেন্টশিং কনখত্তুনা থম্বনি হায়নসু মহাক্না অকনবা মওংদা পেন্দবা ফোঙদোকখি।