ঐনা মহেল্লে খন্দুনা তোখাই-তোখাই চৎনরবদি মৈতৈ ফূরূপ মূৎখিবদা মতম চঙলোই: রাধাবিনোদ

ঐনা মহেল্লে, অতৈদি মৱা লৌদে হায়বা অচাওরম কাবা ৱাখল্লোন্না মাঙ থারগা থবক তৌনদুনা ঐখোয়না তোখাই-তোখাইবা লম্বীদা চৎনরগা থবক তৌনরবদি মৈতৈ ফূরুপ অসী পূঙমূৎ মূৎনবগী লম্বী য়াৎপা হায়বদু ওইগনি, মূৎখিবদা মতম কুইনা চঙলোই। মরম অদুনা ঐখোয় পূন্সীন্দুনা করম্বা লম্বী অমসুং মায়কৈদা খোঙ থাংলগা মালেমগী হোংলক্লিবা মতমগী য়াওলদা তিনবা ঙমগদগে হায়বদু খন্থবগী মতমদু য়ৌরবনি হায়না মনিপুরগী হান্নগী চিফ মিনিষ্টর রাধাবিনোদ কোয়জম্না ফোঙদোকখ্রে।

হন্দক্তা ফল লাউথোকখিবা, কাউন্সিল ওফ হায়র সেকেন্দরি ইদুকেসন মনিপুর (কোসেম) না লৌবা ক্লাস ত্বেল্ব ইগজামিনেসনদা আর্টস ষ্ট্রিমগী ওইনা অনীশুবা পোজিসন তারকখ্রবা হার্স মাইস্নাম্বু তরাম্না ওক্তুনা পূক্নীঙ- থৌগৎপা থৌরম অমা থা অসীগী মরিদা ইম্ফাল নোংচুপ পানাগী থাংমৈবন্দা পাঙথোকখিবদা অথোয়বা মীথূঙলেন ওইনা ৱা ঙাঙবদা হান্নগী চিফ মীনিষ্টর অসিনা ৱাফম অসী ফোঙদোকখিবনি।

থাঙমৈবন্দ এথলেটিক য়ুনিয়ন (থাউ) না শীন্দূনা য়ুনিয়ন অসীগী মান্দোপতা পাঙথোকখিবা ফেলিসিটেসনগী থৌরমদুদা রাধাবিনোদ না মখাতানা হায়,মতমগী অওনবা হায়বসি কনানসু থিংবা ঙম্লোই। মনিপুরদসু মতমগী মতূঙ ইন্না অহোঙবা কয়া লাক্লি। মালেমগী ওইনা লাক্লিবা অহোংবা, অওনবশিং অসীগা মান্ননা চৎপা ঙম্ননবা ঐখোয় মশেল অমত্তা ওইনা পূন্সীন্দুনা চৎনবা হোৎনগদবনি।

তোখায়-তোখাইবা অনীংবদা থবক তৌনরবদি ঐখোয়গী খুন্নাই অসী য়াম্না থুনা মূৎখ্রগনি হায়খি। কুকি-জো কম্যুনিটিনা মনিপুর মচেৎ তানা থুগাইনবা হোৎনরকপদা থৌনা ফরবা ঈচাশিং থোক্লক্তুনা ঈরমদম কনবা ঙম্লি। মসী পুৱারিদা সনাগী ময়েক্না ইদুনা লৈহৌরগনি হায়না মহাক্না ফোঙদোকখি।