ইম্ফাল ইষ্ট দিষ্ট্রিক্টকি চীঙশাংশিংদা কম্বাইন সেক্যুরিটি ফোর্স না কোম্বিং ওপরেসন পাক সন্না চত্থখ্রে

হৌখিবা নুমিৎ মরিনিগী মমাঙদগী কুকি- জো নার্কো টেরোরিষ্ট শিংনা ইম্ফাল ইষ্ট দিষ্ট্রিক্টকি লম্লাই কেন্দ্রগী য়াইঙংপোকপী পুলিশ ষ্টেসন মনূংচন্না লৈরিবা থম্নাপোকপী সবুংখোক সনাশাবী য়াইঙংপোকপী, শান্তিখোঙবান অমসুং সবুংখোক খূনৌনচিংবা মৈতৈ ফূরুপ্না খুন্দারিবা মফমশিংদা অকনবা মওংদা নোংমৈ অমসুং বোম কাপশীন্দুনা লান্দারকপদা মনিপুর পুলিসকি স্পেসিয়েল কম্মান্দো পার্সনেল অমা য়াওনা মীওই অহুম অশোক- অপন মায়োক্নখিবগী মথক্তা খুঞ্জাশিং শাফগদবা মফমশিংদা মনিপুর পুলিসকি কেস্পর গারি শীজীন্নদুনা পুথোরকখ্রবা মতূংদা কম্বাইন সেক্যুরিটি ফোর্সনা থা অসীগী অয়ূক পূং ৭.৩০ তাবদগী মায়কৈ অদোমদা কোম্বিং ওপরেসন চত্থবা হৌখ্রে।

মৈতৈ ফূরূপকি পুলিস পার্সনেল অমত্তা য়াওহন্দনা কোম্বিং ওপরেসন অদূ চত্থবা হৌখিবনি। বোর্দর সেক্যুরিটি ফোর্স (বি এস এফ), সেন্ট্রেল রিজার্ভ পুলিশ ফোর্স (সি আর পি এফ), আসাম রাইফলস ( এ আর) অমসুং মনিপুর পুলিসকি স্পেসিয়েল কম্মান্দো পার্সনেল কয়াগী অপূনবা ফোর্স না কোম্বিং ওপরেসন অদূ চত্থবা হৌখিবনি। য়াইঙংপোকপী অমসুং থম্নাপোকপী অনীগী মরক্তা লৈরিবা মনীংথংবা চীঙগী শরূক্তা কুকি- মিলিটেন্ট শিংনা খূৎলীংদুনা লৈরিবা উয়োকচীংদগী কুকি মিলিটেন্টশিংনা নোংমৈ কাপ্তুনা এত্তেক চত্থরকখিবা মফমশিংদা চঙশীন্দুনা ওপরেসন অদূ চত্থবা হৌখিবনি হায়রি।

হৌজিকফাওবগী ওইনদি ওপরেসন অদুদা কুকি- মিলিটেন্টশিং ফাবা, হাৎপা নত্রগা মখোয়গী বঙ্করনচিংবা থুগাইখিবগী পাউ অমত্তা পীরকপা লৈত্রি।লাঞ্জেন্নখ্রবা খুঞ্জাশিং মশা- মশাগী য়ূমশিদা ঙসীফাওবা চঙশীন্দুনা লৈরুবা ঙমদ্রি। হৌজিকসু মখা তানা মরক মরক্তা কুকি মিলিটেন্ট শিংনা মৈতৈ খুঞ্জাশিং তম্না নোংমৈ কাপ্লকপা লেপ্তনা চত্থরক্লি। নুমিদাংগী মতমদনা হেন্না নোংমৈ বোম্নচিংবা কাপশীল্লি হায়রি।