মনিপুরদা রিকগনাইজ তৌদবা অনৌবা খুল ৯৩৪ হেঙ্গৎলক্লে খঙলবসু লৈঙাক্না থৌশাদ্রিবা অসী অচৌবা চৈথেং মায়োক্নরক্কনি:তোম্বী

মনিপুরদা হৌখিবা কুমশিং ২০১১ দগী ২০২৩ ফাওবগী মনূঙদা লৈঙাক্না রিকগনাইজ তৌদবা অনৌবা খুঙ্গং ৯৩৪ হেঙ্গৎলকখ্রে হায়বসি সেন্তর অমসুং ষ্টেট লৈঙাক্না খঙলবা ফাওবদা ঙসীফাওবা থিগত্তবা অমসুং তকথোকখিনবা থবক অমত্তা পায়খৎপা লৈত্রি। ফীভম অসী অসূম থেঙথখ্রবদি মনিপুরগী য়েলহৌমীশিংদা জিওগ্ৰাফিকেল্লি, দিমোগ্ৰাফিকেল্লি, ইকোনোমিকেল্লি, সোসিয়েল্লি অমদি পোলিটিকেল্লি দিভাষ্টেসনশিং মায়োক্নরকপা মশানা তাবনি।

ফীভম অসী খ্বাইদগী লূম্না লৌবগা লোয়ননা লৈঙাক্না থবক লৌখৎকদবনি, অনৌবা খুঙ্গংশিং অসী মূত্থৎপগা লোয়ননা মীতোপশিং খূদক্তা তকথোক্তুনা মশাগী মরমদমদা হলহনখিগদবনি হায়না সিব সেনা মনিপুর ষ্টেটকি প্রসিদেন্ট মোইরাংথেম তোম্বীনা ফোঙদোকখ্রে। ইম্ফালগী বাবুপারাদা লৈবা সিব সেনাগী ওফিসতা পাঙথোকপা পাউমীশিংগা উনবগী থৌরমদা ৱাফম অসী তোম্বীনা ফোঙদোকখিবনি। নৌনা খুঙ্গং ৯৩৪ হেঙ্গৎলক্লিবসি লৈঙাক্না থিদোক্তুনা ককথৎপিয়ু।এন আর সিগী থবক মপূঙ ফানা পায়খৎলবা মতূঙদা সেন্সস পাঙথোকপিয়ু।

অন-রিকগনাইজ ভিল্লেজ ৯৩৪ অসী য়ূমকোক অমসুং মীকোক থীবদা য়াওশীনখিবা তারবদি দিলিমিটেসন্দা, ভেল্লি এরিয়াদা লৈবা মীয়াম মরক্তা নিংদোন পোম্নরকপা হায়বসি শোয়দ্রবনি হায়খি। মনিপুরদা চৎনদুনা লাকখ্রবা লোকেল সেল্ফ গভর্নমেন্ট ইলেক্সন পাঙথোকপগী মহুত্তা সেলেক্সন তৌদুনা লাকপা চহী ৭ মপূঙ ফারক্লে। মসী মীয়ামগী হক মৎপনি। মসীগুম্বা কন্সটিট্যুসনগী নিতি-নিয়ম থুগাইবগী মতৌ অসীগী মায়োক্তা মনিপুরগী গভর্নর, চিফ মিনিষ্টরনচিংবদা মেমোরেন্দম পীদুনা খঙহল্লগনি হায়না তোম্বীনা ফোঙদোকখি।