মনিপুরদা হৌখিবা কুমশিং ২০২৩ গী মে অহুমদগী হৌরকখিবা, কুকি মিলিটেন্টশিংনা মী হাৎপা, য়ূম মৈ থাবা, বোম-নোংমৈ কাপশীন্দুনা অমদি নেস্নেল হায়ৱে থিংজিনবগী থবক থৌরমশিং অসীনা মরম ওইদুনা মৈতৈ ফূরূপকি মীওই লীশীং ৬০ হেন্না লাঞ্জেন্নদুনা তোঙান তোঙানবা রিলিফ কেম্পশিংদা লৈরি।
অসীগুম্বা, মীয়াম্না হা-কার লাউনা অৱাবা, খুদোংচাদবা কয়ামরুম মায়োক্নদুনা লৈরিঙৈ চৈরকশিদা ষ্টেট লৈঙাক্না সেন্টরগী ওর্দর মতূঙ ইন্না লাক্লিবা সেপ্তেম্বর থাদগী য়ূমকোক থীবগী থবক লমদমশিদা পায়খৎলগনি হায়রক্লিবসি অথূবা মতমদা খোঙফম হন্দোকপিয়ু হায়না ইম্ফাল ইষ্ট দিষ্ট্রিক্টকি মনূঙচন্না শজীৱা জেল কমপ্লেক্সতা লৈরিবা আই দি পিশিংনা অকনবা ৱাফম ফোঙদোকখ্রে।
শজিৱা জেল মনাক্তা, প্রি-ফেব্রিকেটেদ হোমদা চঙজফম লৌদুনা লৈরিবা আই দি পিশিংগী মনূঙদা ইকৌদগী লাকখিবা খোইরোম ধমেন্না হায়, মনিপুরগী ঈরাংনা মরম ওইরগা লাঞ্জেন্নরকপদগী রিলিফ কেম্পশিংদা লৈরিবা আই দি পি পূম্নমক মপুঙ ফানা মশা-মশাগী মহৌশাগী লৈফমশিংদা হঞ্জিলহনখ্রবা মতূঙদা য়ূমকোক থীগদবনি।মদূ লৈঙাক্না থবক্তা ওন্থোরক্ট্রবদি লৈঙাক্কি থবকশিংদা কো-ওপরেসন পীদবগী মথক্তা মীয়ামগা খূৎশম্নদুনা হেন্না অকনবা মখল কয়াগী খোঙজঙ চঙশীনগনি হায়না ধমেন না ফোঙদোকখি।
