হাৎন-শুনবনা চাওখৎপা,ঈং তপ্পা খুন্নাই অমা শেম্বা ঙম্লোই: ও ইবোবি

ঐখোয় মশেল মরক্তা পেন্নদবা,নুঙাইনদবা কয়া লৈরবসু,হিংমিন্নরিবা কাঙলূপশিংগী মরক্তা মোৎ খেন্নবা য়াওরবসু হীঙশা অমদি হাৎন-শুনবগী মহূত্তা ৱাখল তানা,শান্তি ওইবা মওংদা ফম্মিন্নরগা য়াশিন্নবা পুরকসি।ভাব তামিন্নদুনা,পেন্দবা লৈরম্বশিং অদূ ৱাখল খন্থমিন্নদুনা চমথোক্নরগা নুংশি-চান্ননা হিংমিন্নবা অমসুং অমনা অমগী খুদোংচারক্তবা,অৱাবা মতমদা মতেং পাংনবা অসীনা চাওখৎপা,তঙদূ-লৈতাবা খুন্নাই অমা পুরক্কদৌরিবনি হায়না মনিপুরগী হান্নগী চিফ মিনিষ্টর ওক্রম ইবোবিনা ফোঙদোকখ্রে।

থৌবাল দিষ্ট্রিক্টকি হৈরোক পার্ট -টু,ময়ায় লৈকায়দা লৈরিবা মেমোরিয়েল কমপ্লেক্সতা ঙরাং পাঙথোকখিবা, মতম অমদা মনিপুর লৈঙাক্কি রেভিন্যু মিনিষ্টর ওইনা লৈরম্বা হৈরোক ইবোতোম্বী লৈখিদবগী কুম্মোন থৌরমদা ৱা ঙাঙবদা ইবোবিনা ৱাফম অসী ফোঙদোকখিবনি।মী‌য়াম্না হৈরোক ইবোতোম্বী হায়রগা হেন্না খঙনখিবা লৈখিদ্রবা মোইরাংথেম ইবোতোম্বী অসী মতমদুদা লৈঙাক্কি থৌগাই কয়ামরূম পুরমখিবা শক্নায়রবা লুচিংবা অমনি।মহাকপু ঙসীফাওবদা মনিপুরগী মীয়াম্না কাউঙমদনা শোন্নহৌরি।মহাকপু মশামক্কি হৈরোক্তা লৈবা য়ূম মক্তদা শকখঙদবা খূৎলায় পায়বশিংনা নোংমৈনা কাপ্তুনা হাৎলমখিবনি। থৌওং অদূ য়াম্না হিংচা-য়াইতম্বা অমদি পাঙদবশিংগী লীচৎনি হায়বা ৱাফমশিং হান্নগী চিফ মিনিষ্টর অসীনা ফোঙদোকখি।

লৈবাক মচা তাবা,চাওখৎলবা খুন্নাই অমদা হীঙশা হায়বসিগী চন্নফম অমত্তা লৈতে,মসীনা মীওইবা খুন্নাইগী শান্তি অমসুং চাওখৎ-লমজেলদা মনীঙ হলহনবা নত্তনা কান্নবা অমত্তা পীদে হায়না মহাক্না মীয়ামদা হীঙশাদগী য়াম্না লাপথোক্না লৈননবা আপিল তৌখি।হৈরোক ইবোতোম্বী মেমোরিয়েল ট্রষ্টনা শীন্দুনা পাঙথোকখিবা থৌরমদুদা কংগ্ৰেস পার্টিগী লুচিংবা কয়াসু শরূক য়াখি।