চৎলিবা জূন থা অসীগী ১২ দা গুজরাটকি সর্দার বল্লভভাই পটেল ইন্টর্নেস্নেল এয়রপোর্টতগী লন্দনগী গেটৱিক তম্না পাইবা হৌরকপদা পোকখায়দুনা কায়খ্রবা এয়র ইন্দিয়াগী ফ্লাইট অদুদা এয়র হোষ্টেজ ওইনা থবক তৌবী থৌবাল বজারদগী কুমারি ঙান্থোই শর্মগী থৱায় য়াওদ্রবা হকচাং ঙরাং ইম্ফাল য়ৌরকখ্রে। মনিপুরগী লোক সভাগী এম পি অঙোমচা বিমোল অকোয়জম, খাঙবোক কেন্দ্রগী এম এল এ ওক্রম সুর্জকুমার, মনিপুরগী চিফ সেক্রেটরি পি কে সিংহ, দি জি পি রাজিব সিংহ, এয়রপোর্ট অথোরিটি ওফ ইন্দিয়াগী ষ্টাফশিং অমসুং মশীঙ য়াম্লবা মীয়াম্না বির টিকেন্দ্রজিৎ ইন্টর্নেস্নেল এয়রপোর্ট তা মহাকপু ওকখিবগা লোয়ননা লৈ-শু কয়ামরুম কত্তুনা ঈকায়খুম্নবা ঊৎখি।
মফম অদুদগী ঙান্থোইগী থৱায় য়াওদ্রবা হকচাং হাপ্লকপা কূ অদূ মীয়াম্না মহাক্কি পোক্নফম লমদম থৌবাল বজারদা পুদুনা লাকখি। মফম অদূ য়ৌরবা মতূঙদা ঈমূঙ- মনূঙগী মীওইশিং, মরী- মতাশিং, লমদম অদোমগী মশীং য়াম্লবা মীয়াম্না মীকপ-মীরাওখোলগা লোয়ননা লৈ কত্তুনা ঈকায়খুম্ন বা ঊৎনখি।
কোংব্রাইলাৎপম ঙান্থোই শর্ম অসী এয়র ইন্দিয়াগী এয়র হোষ্টেজ ওইনা এপ্পোইন্ট তৌখিবা শূপ্নগী চহী অমরোমদমক ঙায়রিবনি। হন্দক্কি লাইবক থীবা প্লেন ক্রাস অদুদা পূন্না মীওই ২৪২ তোংখিবগী মনূঙদা মীওই ২৪১ শিখিবদা ঙান্থোই শর্মসু য়াওখিবনি।