মনিপুর অসী হৌজিক মৈ হৌনা চাক্লিবনি,মায়কৈ খূদীংদা মীকপ -মীরাওখোলনা নিল্লিবনি।কুমশিং ২০২৩ গী মে অহুমদগী হৌরকখিবা হীঙশাগী ঈরাঙনা শোকহনবদগী ঙসীফাওবা রিলিফ কেম্পশিংদা মীওই লীশিং হুম্ফুতরা হেন্না চঙজফম লৌদূনা,মশাগী ময়ূমদা হঞ্জিলহনবা ঙমদনা লৈরি অদুগা নেস্নেল হায়ৱেশিংদা মীয়াম চৎথোক -চৎশীন তৌবা য়াহন্দ্রিবসি অথূবা মতমদা য়াহল্লু,ফীভমশিং অসী কোকহন্দ্রিঙৈ মতমদা সঙাই ফেষ্টিভেল পাঙথোক্নবা লৈঙাক্কি থৌরাং অসী তৌবিখিগনু হায়না মীয়াম্না,মরুওইনা আই দি পিশিং অমসুং কোকোমিনা লাউদুনা লাক্লবসু ঙম্মি মতাগুম পি আর লৈঙাক অসীনা ঙরাংদগী হৌরগা সঙাই ফেষ্টিভেল পাঙথোকপা হৌখ্রে।
মীয়ামগী সপ্পোর্ট য়াওদ্রবদি লৈঙাক্কি থবক -থৌরমশিং মায় পাক্তে হায়বদু ঙরাংসু ময়েক শেংনা ঊৎখ্রে।লৈঙাক্কি দিপার্টমেন্ট খরগী ষ্টোল খরা নত্তনা ষ্টোলশিং অয়াম্বদা মীওইবদি লায়রদনা তূমীৎ – কাঙফাও পাইখিদ্রে। ফেষ্টিভেল অরেম্বা তাখ্রে। শজিৱা জেল মনাক্তা লৈরিবা আই দি পিশিং অমসুং শওম্বুং রিলিফ কেম্পতা লৈরিবা আই দি পিশিংনা ঈরাঙ হৌরক্তুনা,মখোয়বু মশা -মশাগী ময়ূমশিংদা হঞ্জিলহন্ননবা থৌরাং তৌবগী মহুত্তা পি আর লৈঙাক অসীনা বদজেটকি শেনফম শায়েন-ঙায়েন্নবা য়াননবা হায়দুনা সঙাই ফেষ্টিভেল পাঙথোক্লিবসি আই দি পিশিংবু অমসুং মনিপুরগী মীয়াম্বু উশীত্তবনি হায়দুনা অকনবা ঈহৌ চঙশীল্লক্তুনা ফেষ্টিভেল পাঙথোক্লিবা হপ্তা কাঙজৈবূঙ তম্না থোমজীল্লকপগী লম্বীদা খূরায় শাজোর লৈকায়দা লৈবা ঈমা লাইখূলেম্বী মপাদা পুলিসনা থৎখি।
মফমদূদা নাকল অনীগী মরক্তা মূক্নরকপদা ইম্ফাল ইষ্টকি দি এস পি অমা য়াওনা পুলিস পার্সোনেল অনী আই দি পিশিংনা ফাজীন্দূনা থমখি অদুগা পার্সনেল অহুম্না অশোক -অপন মায়োক্নখি।কোন্নথংদা ৱারী শান্নদুনা য়ানবা পুরকপদগী ফাজীল্লুরবা পুলিস পার্সনেলশিং অদু অমূক থাদোকখ্রে।পুলিসনসু ত্যার গ্যাস সেল কয়ামরুম কাপখি।