ইম্ফাল ম্যুনিসিপাল কোর্পোরেসন, মনিপুর পুলিস অমদি মনিপুর পোল্যুসন কন্ট্রোল বোর্দনা খূৎশম্নরগা মনিপুরগী তোঙান তোঙানবা মফমশিংদগী ফাগৎলকখিবা মেক্রোন শুদবা সিঙ্গল য়ুজ প্লাস্তিক কেরি বেগ কেজি ৪৫২৫, রিসাইকল তৌননবগীদমক তেন্থা মারোংবন্দ দা লৈবা এম/এস আশোক ট্রেদর্স তা খূৎশীন্নখ্রে।
আশোক ট্রেদর্স না প্লাষ্টিক্কি পোৎলমশিং অদূ মেঘালায়াগী বর্নিহাত তা লৈরিবা ককরানিয়া ইন্নোভেটিব সিষ্টেম প্রাইভেট লিমিটেদ তা রিসাইকল তৌরুগদবনি হায়রি। জি এস এম ৩৬০ গী মখাদা লৈবা সিঙ্গল য়ুজ প্লাস্তিক কেরি বেগ শিং মখাতানা ফাগৎপগী খোঙথাঙ লৌখৎখিগনি হায়বা ৱাফম ইম্ফাল ম্যুনিসিপাল কোর্পোরেসন গী দিপ্যুটি সেনিটরি ওফিসার ওইনা লৈরিবা লিসম লুপেন্দ্রনা ফোঙদোকখিবগা লোয়ননা মীয়াম্নসু হীরমসিদা মতেঙ পাংবিয়ু হায়খি।
মহাক্না মখাতানা হায়,মমাঙ চহীগী নবেম্বর ৩০ দা ইম্ফাল ম্যুনিসিপাল কোর্পোরেসন্না তোঙান তোঙানবা মফমশিংদগী ফাগৎলকখিবা কেজি ৩০/৩০ লূম্বা সিঙ্গল য়ুজ প্লাস্তিক কেরি বেগ পূন্না ২৪ অমসুং হৌখিবা দিসেম্বর ২৪ দা মনিপুর পুলিস, মনিপুর পোল্যুসন কন্ট্রোল বোর্দনচিংবগা খূৎশম্নদুনা মফম কয়াদগী ফাগৎলকখিবা অসীগুম্বা প্লাষ্টিক কেরি বেগ ময়ামগা পূল্লগা কে জি ৪৫২৫ অসী নৌনা রিসাইকল তৌননবা থৌরাং অসী লৌখৎলকপনি।মীয়াম্নসু অসীগুম্বা মেক্রোন শুদবা কেরি বেগ শীজীন্নবা অসী খূদক্তগী তোকপিয়ু হায়না মহাক্না ফোঙদোকখি।
