ঐচ এস এল সি ইগজাম ঙসীদগী হৌখ্রে, অরানবা তৌবশিং চহী তরাফাওবা জেলদা থম্বা য়াই : বোসেম

হন্দক চহিগী ওইনা বোর্দ ওফ সেকেন্দরি ইদুকেসন মনিপুর (বোসেম) না লৌবা হায় স্কুল লিভিং সার্টিফিকেট (ঐচ এস এল সি) ইগজামিনেসন ২০২৬ ঙসীদগী হৌখ্রে। অকনবা চেকশীন-থৌরাংশিং লৌখৎলবা মতূঙদা ঙসীদগী পাঙথোক্লিবা ইগজামিনেসন অসীদা অরানবা তৌরম্বা মহৈরোয়-কেন্দিদেট অদূ চহী ১০ ফাওবা জেলদা লৈহনবগী মথক্তা ফাইন ওইনা লূপা ক্রোর ১ লৌখৎপা য়াই হায়না বোসেম্না অকনবা ৱাফম ফোঙদোক্তুনা মরী লৈনবশিংদা ৱার্নিং তৌখ্রে। ঙরাং বোসেমগী ওফিসতা পাউমীশিংগা উনবদা বোর্দ অসীগী সেক্রেটরি শীজগুরুময়ূম জিতেন লালনা হায়, অকনবা চেকশীল-থৌরাংশিংগা লোয়ননা ইগজামিনেসন অসিগীদমক ইন্সপেক্সন টিম ৭২ শেমখ্রে।

টিম ৩৬ না চীঙগী সেন্টরশিংদা, অদূগা লেমহৌরিবা টিম ৩৬ না তম্পাক্কি সেন্টরশিংদা য়েংশিনগনি।মথক্তগী মপূঙ ওইনা য়েংশিন্দুনা মোনিটর তৌনবা বোসেমগী ওফিসতা কন্ট্রোল রুম অমসু হাংদোক্লে হায়না জিতেন লালনা মখা তাখি। মহাক্না ফোঙদোকখিবা মতূঙ ইন্না, হন্দক্কি ঐচ এস এল সি ইগজামিনেসন অসীদা পূন্না মহৈরোয় ৩৬,৭২৫ না শরূক য়ারি।মসীগী মনূঙদা তম্পাক্তা মহৈরোয় ১৭,৬৭৯ অমসুং চীঙগী সেন্টরশিংদা পূন্না মহৈরোয় ১৯,০৪৬ না ইগজাম অসী মায়োক্নরি।তম্পাক্তা ইগজাম সেন্টর ১০০ অদুগা চীঙদা সেন্টর ৬১, পূন্না ইগজাম সেন্টর ১৬১ দা হন্দক্কি ইগজামিনেসন অসী পাঙথোক্লি।

মহৈরোয় নূপা ১৮,৩৭৫ অমসুং নূপী মহৈরোয় ১৮,৩৫০ নি।গভর্ণমেন্ট স্কুলগী মহৈরোয় ৮,১৯১, এদ্দেদ স্কুলশিংদগী মহৈরোয় ১,৪৯৮ অমদি প্রাইভেট স্কুলশিংদগী মহৈরো‌য় ২৭,০৩৬ না ইগজাম অসীদা শরুক য়ারিবনি হায়খি।হন্দক্কি ইগজাম অসীদা আই দি পি মহৈরোয় ৩৯২ য়াওরি। মসীগী মনূঙদা ২৩১ না তম্পাক্কী, অদূগা ১৬১ না চীঙগী দিষ্ট্রিক্টশিংদগীনি। বোসেম্না ইগজাম অসী নীংথীনা পাঙথোক্নবগীদমক নোদেল ওফিসার ১০ সু হাপ্তুনা মথৌ পাঙথোকপা হৌখ্রে হায়রি।