দ্রাইভর ফূরকখিবা মীওই চৈরাক পীদ্রবদি হেন্না অকনবা খোঙজং চত্থরগনি:টেঙ্কর দ্রাইভরশিং

চৎলিবা জূন থা অসীগী ১৪ দা সেকমাই বোট্টল্লিং প্লান্ট তা গ্যাস সিলিন্দরনচিংবা থারুরগা হল্লকখিবা এল পি জি বূল্লেট টেঙ্কর দ্রাইভর কে ঐচ হেরোজিৎ, লৈফম্না ককচীঙ খূনৌগী উমাথেল হায়রিবা টেঙ্কর দ্রাইভর অসীনা নুমিত্তুদা ইম্ফাল ইষ্ট দিষ্ট্রিক্ট কি মনূঙচন্না লৈরিবা খাবম লমখায় মপা খরা হেন্দোরকপা মতমদা শকখঙদবা খূৎলায় পায়বা, কম্মান্দোনি হায়না মশানা শকতাকচবা, অমুবা ফূরিৎ লীৎপা, স্কোরপিয়ো অমদা লাকপা মীফত্তা অমনা নোংমৈ নমদুনা কিহন-খংহনখিবা অমসুং য়াম্না তমথীনা ফিজিকেল এসোল্ট চত্থরকপদগী লায়কন্নহনখিবা থৌদোক অদুগী মতাঙদা লৈঙাক্কি অথোরিটিনা থিগৎপিদুনা আইনগী ওইবা অহকপা চৈরাক পীবীয়ু হায়বা দাবী তৌদুনা টেঙ্কর দ্রাইভরশিংনা ষ্টিয়ারিং পায়দবগী খোঙজঙগা লোয়ননা পূঙ ৪৮ গী মনূঙদা মরাল লৈরবা মীওই অদূ ফাদুনা চৈরাক পীননবা থাখিবা মতমদুগী মনূঙদা লৈঙাক অসীনা থবক অমত্তা লৌখৎলকখিবা লৈত্রি।

মসী য়াম্না লাইবক থীবা অমনি হায়না এল পি জি বুল্লেট টেঙ্কর দ্রাইভরশিংনা অকনবা মওংদা পেন্দবা ফোঙদোকখ্রে। করিগুম্বা ষ্টেট লৈঙাক অসীগী মরী লৈনবা অথোরিটিনা মীফত্ত অদু ফাগত্তুনা মতীকচাবা আইনগী চৈরাক পীবা ঙমদ্রবদি ইম্ফাল খক্তা নত্তনা জিরিবাম টু ইম্ফাল চেনবা থাউ পুবা অমসুং গ্যাস বুল্লেট টেঙ্করশিং চঙলকপা থিংবা য়াওনা অতৈ মখল কয়াগী খোঙজঙ চঙশীন্ননবা থৌরাং পূম্নমক শেম-শাবা লোইরে হায়রি।

দ্রাইভরশিং অসীনা চত্থরকখিবা ষ্টিয়ারিং পায়দবগী খোঙজঙ অসীনা মরম ওইদুনা হৌজিকসূ কৈথেলমানবিদগী মোইদাংপোক ফাওবগী মরক্তা থাউ অমসুং গ্যাস পুরকপা গারি ১৫০ রোম পরেং লেংদুনা, পন্থদুনা লৈরিবনি।