দিসেম্বর ২৮ ফাওবদা লৈঙাক্না থবক পায়খৎলক্ট্রবদি ওইল পম্পশিং থোঙ লোল্লগনি:দিল্লর্স ফ্রেটরনিটি

মনিপুরগী তোঙান তোঙানবা মফমশিংদা লৈরিবা ওইল ফিল্লিং ষ্টেসনশিং অমদি ওথোরাইজ রিটেল আউটলেটশিং দা শকখঙদবশিংনা আইনগী ৱাংমদা শেনখায়-থুমখাই চত্থরকপগা লোয়ননা মখোয়গী দিমান্দ পীদ্রবদি খুদোংথীবা নংগনি হায়না অকি-অখঙ পীরকপা,ওইল পম্পশিংগী কমপ্লেক্সতা বোম থমজিনবনচিংবগী থৌওংশিং ঙসীসু লেপ্পা লৈতনা চত্থরক্লি।

থৌওংশিং অসীগী মতাঙদা চূনবা থবকশিং লৌখৎপিদুনা ওইল পম্পশিং মখাতানা থবক তৌবা য়াহনবিয়ু,মীয়ামগী থৌগল তৌজগে হায়বা ৱারোলশিং য়াওবা মেমোরেন্দম অমা ষ্টেট অসীগী গভর্নরদা হৌখিবা দিসেম্বর ১০ দা পীশীনখ্রবসু ঙসীফাওবা লৈঙাক অসীনা ওইথোকপা য়াগদবা মওংদা করিগুম্বা মখলগী থবক অমত্তা পায়খৎলকপা লৈত্রি হায়না মনিপুর পেট্রোলিয়ম দিলর্স ফ্রেটরনিটিনা চেরোল অমদা য়াম্না অকনবা মওংদা য়ানিংদবা অমসুং পেন্দবা ফোঙদোরক্লি।

চেরোল অসিদা দিল্লর্স ফ্রেটরনিটি না ফোঙদোরক্লিবদি,আইন্না য়াদবা মখলগী শেনখাই-থুমখাই চত্থরকপগী থৌওং ঙসীফাওবা লেপত্রি।পেত্রোল পম্পশিংদা কিহনবা,বোম থমজিনবগী থৌওং কয়া চত্থরকপগী মায়োক্তা লৈঙাক্না এক্সন অমত্তা লৌখৎপা ঙমদনা লৈরি।মসীগী ওন্ন-তৈনবদা,শকখঙদবশিংদা শেনখাই-থুমগাইগী মতেঙ পীরম্বা ওইল দিল্লরশিংদা লৈঙাক অসীনা সম্মোন লেট্টর থাজীল্লক্তুনা কৌখৎপা,এন এস এ পান্দুনা চৈরাক পীগনি হায়না কিহনবগী মওং-মতৌশিং অসীনি ।মসীদি থিঙেলদা তাইনবা ঙমদ্রগা নাসিখোংদা তাইনবগী থৌওংনি,ঈকায়নিঙায়নি। থৌওং অসী খূদক্তা লেপকদবনি।অসূম্না নাকল অনীমক্না পেট্রোল পম্প দিল্লরশিংদা অওক-অথোম শান্নদুনা লৈবা অসী লেপ্তুনা,দিসেম্বর ২৮ ফাওবগী মনূঙদা চূনবা থবক পায়খত্রবদি মথঙগী নুমিত্তগী ওইল পম্প পূম্নমক মতম চূপ্পগী ওইনা থোঙ থিংলগনি হায়রক্লি।