লৈবাক অসীগী হান্নগী ভাইস প্রসিদেন্ট ওইরম্বা জগদ্বিপ নঙ্করনা হন্দক থা খরগী মমাঙদা ভি পি ফমদগী মশানা রিজাইন তৌখ্রবা মতূঙদা হাঙদুনা লৈরকখিবা ফম অসী মেন্সিন্ননবা মীখল পাঙথোকখিবগা লোয়ননা হায়রিবা মীখল অদূদা মায় পাক্লকখ্রবা সি পি রাধাক্রিষ্ণনবু লৈবাক অসীগী ১৫ শুবা ভাইস প্রসিদেন্ট ওইনা ৱাশক লৌবগী থৌরম পাঙথোকখ্রে।
ঙরাং রাষ্ট্রপতি ভবন্দা পাঙথোকখিবা থৌরমদুদা প্রসিদেন্ট দ্রৌপদি মুর্মুনা রাধাক্রিষ্ণনবু থবক পায়বা অমসুং অরোনবা ঙাকপগী ৱাশক লৌখি। থৌরম অদুদা প্রাইম মিনিষ্টর নরেন্দ্র মোদি, য়ুনিয়ন হোম মিনিষ্টর অমিট শাহা, য়ুনিয়ন দিফেন্স মিনিষ্টর রাজনাথ সিংহ, হান্নগী ভি পি জগদ্বিপ ধঙ্কর শরুক য়াখি লোয়ননা মকোকথোংবা লুচিংবা কয়াসু থৌরম অদুদা শরুক য়াখি।
তামিল নাডুগী তিরুপুরদা কুমশিং ১৯৫৭ কি মে ৪ দা তাইবংদা খোঙদারকখিবা রাধাক্রিষ্ণন অসী য়াম্না ঙল্লিঙৈদগী হৌনা রাষ্ট্রীয় স্বায়ম সেবক সঙ্ঘ ( আর এস এস) দা য়াওদুনা লাকখিবা মীশক অমনি। মহাক কুমশিং ১৯৯৮ দা অহানবা ওইনা বি জে পি গী টিকেত্তা কোইম্বাতুর কন্সটিট্যুয়ন্সিদগী লোক সভাগী মীখলদা মায় পাক্লকখিবনি।
