সংবিধান বচাউ রেল্লি কুম্বিদা এম পি সি সিনা শীন্দুনা পাঙথোকখ্রে

মনিপুর প্রদেস কংগ্রেস কম্মিটি (এম পি সি সি) না শীন্দুনা সংবিধান বচাউ রেল্লি অমসুং সংবিধান মতৌ করম্না কনগদবগে হায়বগী মতাঙদা মীয়াম পূন্না খঙমীন্ননবা মীফম অমা ঙরাং কুম্বিদা পাঙথোকখ্রে। বি জে পি লৈঙাক লাকপদগী লৈবাক অসিদা লৈরিবা তোঙান- তোঙানবা কম্যুনিটিশিংগী মরক্তা তোখাই তানহন্ননবা, নুংশিনদনবা, অমগা অমগা খৎন-চৈনদুনা মচেৎ তানহন্ননবা অমসুং সংবিধান মচেৎ তানা শেমদোক্তুনা কায়হন্নবা থৌরাং তৌরক্লি। ভোৎ কাহৌদবা য়াদে হায়বগী মীৎয়েংদা ধর্মা কাঙলূপশিংগী মরক্তা তাথী-তাওইননবা খূজীল-থৌরাং তৌদুনা অরানবা প্রোপেগন্দা কয়া শাগত্তুনা হীন্দূ নত্তবা অতৈ জাতিশিংবু তুম্না মাঙহন্ননবা থৌরাং অমা বি জে পি লৈঙাক্না পায়খৎলক্লি হায়না এম পি সি সি না অকনবা মরাল শীখ্রে।

ইন্দিয়া অসী জাতি-কাঙলূপ ময়াম্না পূল্লগা শেম্লকখিবা লৈবাক অমনি হায়বসি খঙশীন্নদনা, নমশীন্দুনা থম্লগা হীন্দূখক্তগী লৈবাক অমা শেম্ননবা অখূবা মীৎয়েংদা বি জে পি না রাজনিটি শান্নদুনা তুম্না মাঙহন্ননবা হোৎনরক্লে। সংবিধান শেম্লম্লিবা, সংবিধানগী মপা হায়রগা খঙনরিবা দা. ভিমরাউ অম্বেদকরনা মঙজরম্বা মঙলান অমসুং শাগৎচরম্বা আসা পূম্নমক বি জে পি না মাঙহন্ননবা, থুগাইনবা হোৎনরক্লিবা কয়া অসীদগী মীয়াম্না চেকশীনগদবনি, মীৎ-না শিংনা লৈগদবনি হায়না রেল্লি অদূদা শরুক য়াখিবা এম পি সি সিগী প্রসিদেন্ট অমসুং ৱাংখেম কেন্দ্রগী কংগ্রেস এম এল এ কৈশাম মেঘচন্দ্রনা ফোঙদোকখি।

মীয়ামগী ওইবা মীফম অমসু কুম্বি ব্লোক কংগ্রেস কম্মিটিনা শীন্দুনা কুম্বি লৈরক অচৌবা ঈবুধৌ খোঙবূ মঙাগী লাইবুংদা পাঙথোক্তুনা সংবিধান কন্ননবা ৱাফম কয়া খন্ন- নৈনখি।