চীঙবূরোই-তম্বুরোয় অনী নুংশিনবগী মরী চেৎশীলহল্লিবা মেরা হৌচোংবগী থৌরম ষ্টেটকি থাক্তা পাঙথোকখ্রে

চহী খূদীংগী মনিপুরদা খুন্দা- লৈতাদুনা লৈমিন্নরক্লিবা য়েলহৌমী ফূরূপশিং, থোইদোক-হেন্দোক্না মৈতৈ অমসুং নাগা কাঙলূপকি মরক্তা মহৌশাদগী লৈরক্লবা মচীন-মনাও অমত্তা ওইবা, অচেৎপা নুংশিনবগী মরী চেৎশীলহল্লিবা মেরা হৌচোংবগী থৌরম ষ্টেটকি থাক্তা পাঙথোকখ্রে। রাজ্য সভাদা মনিপুরগী এম পি ওইনসু লৈরিবা নিংথৌ লৈসেম্বা সনাজাউবনা মরুওইবা য়ূম্বূরেল ওইদুনা ঙরাং অয়ূক্কি অঙনবা শরুক্তা চীঙূ লাই খুরুম্লবা মতূঙদা কংলা তম্না চীঙবূরোই- তম্বুরোইশিংগী অপূনবা খোঙচৎ অমগা লোয়ননা লাক্লবা মতূঙদা কংলা উত্রা মমাঙদা মেরা মেন তোংবা থৌরম পাঙথোকখি।

মনিপুরদা পূন্না হিংমিন্নদুনা লৈরক্লবা ঐখোয় য়েলহৌমী কাঙলূপ পূম্নমক্না ঈমালৈবাক, ঈরমদম অসীবু ঙাকমিন্নদুনা, য়েক্নবশিংগী খূত্তগী কন্ননবা পূন্না হোৎনমিন্নগদবনি। মালেমগী অতৈ মফমশিংদা পাঙথোক্নরিবা ফেষ্টিবেলশিং অসীদি কাঙলূপ অমমমগী মশাগী তোপ- তোপ্পা আইদেন্টিটি মশক তাকননবা পাঙথোক্নরিবা ঙাক্তা ওইনা তৌই অদূবু ঐখোয়গী মেরা হৌচোংবগী থৌরম অসীদি কাঙলূপ, ফূরূপশিং পূন্সীন্নদুনা অমত্তা ওইবগী অচেৎপা মরী শাগৎলিবা থৌরম অমা ওইবনা অতৈশিংদগী তোপ- তোপ্পা, তোমথিন ওইরিবা থৌরম অমনি।

অসীগুম্বা থৌরম অমত্তা মালেমগী অতৈ মফমশিংদা উবা ফংদ্রি হায়না নিংথৌ অসিনা ফোঙদোকখি। নিংথৌনা মেরাগী থাউমৈ চূখৎখিবগা লোয়ননা কবুই জাতিগী শক্নায়রবা অমাইবা গাংমুমৈ কামৈনা য়েঙ্খোং তম্বা থৌরম পাঙথোকখি। মনিপুরদা হৌজিক তুরৈ-ইরৈ চনবগী ফীভম খরা মায়োক্নরবসু মমৈথঙদা অচূম্বনা মায় পাক্কনি হায়বগী খূদম-চাংদমশিং য়েঙ্খোং তম্বা থৌরম অদুদা ফংবসু ঙমখি।