লম্বীদা গারি থৌবা মতমদা ট্রাফিক্কি রুল ঙাক্তবা অমসুং থৌশাদবা মওংদা থৌবদগী এক্সিদেন্ট থোক্তুনা শিবা মীওইগী ঈমূঙ-মনূঙশিংদা কম্পেন্সেসন অমত্তা পীফম থোক্তে হায়না লৈবাক অসীগী খ্বাইদগী অৱাংবা ৱায়েন লোয়শঙ অমা ওইরিবা সুপ্রিম কোর্টনা ফোঙদোকখ্রে।
এক্সিদেন্ট থোকপদা লৈখিদ্রবা মীওই অমগী লোয়নবী,মচানূপা অমদি ইমুং মনুংগী মীওইশিংনা ইন্সুরেন্স কম্পনি অমদগী লূপা লাখ ৮০ পীহন্নবগী মতাঙদা কোর্টতা থাঙ্গৎলকখিবা ৱাকৎ অমা খন্নরকপা মতাঙদা এপেক্স কোর্ট অসীনা ৱাফম অসি ফোঙদোকখিবনি।
ৱাকৎ অদূ অহানবদা কর্ণাটাকা হায় কোর্টতা লানখৎলকখ্রবা মতূঙদা হৌখিবা কুমশিং ২০২৪ গী নবেম্বর ২৩ দা হায় কোর্ট অদুনা মখোয়গী ৱাকৎ অদূ মরম চাদে,লৈখিদ্রবা মীওই অদুনা ট্রাফিক রুল পূম্নমক থুগাইরগা চেকশীন্দবা মওংদা গারি থৌবদগী মথন্তা এক্সিদেন্ট থোক্তুনা শিখিবনি হায়বগী চপচাবা খূদম ফংলে হায়রকখিবগা লোয়ননা অসিগুম্বা মওংদা শিবা মীওইশিংগী ইমুং মনুংগী মীওইশিংদা কম্পেন্সেসনগী শেনফম অমত্তা পীফম থোক্তে হায়না হায় কোর্ট অদুনা জজমেন্ট পীরকখিবনি।
হায় কোর্টকি ৱায়েল অদূদা খূৎ থিংজিনবা মরম চাদে,চেকশীনবা ৱাৎপদগী শিখিবা মীওইগীদমক কম্পেন্সেসন পীবা চুম্লোই হায়না সুপ্রীম কোর্টকি জষ্টিস পি এস নরসিংহ অমদি জষ্টিস আর মহাদেবন অনীগী বেঞ্চনা ফোঙদোকখি।এন এস রবিসা কৌবা মীওই অমনা কুমশিং ২০১৪ গী জূন ১৮ দা মালাসেন্দ্রা ভিল্লেজদগী অরাসিকেরি টাউন ফাওবা চেকশীন্দনা গারি থৌরকখিবগী লম্বীদা মশা মথন্তা এক্সিদেন্ট থোক্তুনা শিখিবনি হায়রি।
