জিরিবাম দিষ্ট্রিক্টকি বোরোবেক্রা পুলিশ ষ্টেসননা কোনবা টুলসোলেন ভিল্লেজ মনাক্তা লৈবা বারাক রিভর বেঙ্কতগী মার পিপলস কনভেন্সন (দিমোক্রেটিক) গী মীওই অমা হেরোইন পাউদর গ্ৰাম ৪৫৭ কা কোন্ননা কম্বাইন সেক্যুরিটিগী টিম অমনা ফাগৎপা ঙমখ্রে।
থা অসীগী মাপন্দা সেক্যুরিটি ফোর্সনা অকক্নবা পাউ অমা ফংবদগী জিরিবাম দিষ্ট্রিক্ট পুলিশ অমসুং ৩৮ শুবা আসাম রাইফলসকি অপূনবা টিম অমনা টুলসোলেন ভিল্লেজ গা থংননা বারাক রিভর বেঙ্ক মনাক্তা চঙশীন্দুনা ওপরেসন চত্থবদা মার পিপলস কনভেন্সন (দিমোক্রেটিক) গী এক্তিব কাদর অমা হেরোইন পাউদর গ্ৰাম ৪৫৭ কা কোন্ননা ফাগৎপা ঙমখিবনি হায়রি।
ফাগৎখ্রবা মীওই অদূ ফেরজোল দিষ্ট্রিক্টকি লুংথুইলিয়েন ভিল্লেজদগী লালচুওইলো (৪৮) কৌই হায়রি। ফাগৎলবা দ্রগকি পোৎলমশিং অদু সোপ কেস ৪৪দা হাপ্তুনা পুরকখিবনি হায়নসু পাউ অসীনা মখা তারি। মঙোন্দগী বোম শাবদা শীজিন্নবা মচাক খরসু ফাগৎপা ঙমখি। এক্সপ্লোসিব ষ্টিক ২০, দিটোনেটর ১১ অমসুং সেফটি ফ্যুজগী মিটর অমা শাংবা মচাক ফংবা ঙমখি হায়নসু জিরিবাম পুলিসনা ফোঙদোকখি।