বৈজিংনা ৱাশিংটনগা ট্রেদ টোল্ক চত্থনবা থোঙ লাওনা হাংদোক্লে হায়না লাউথোকখ্রে

য়ুনাইটেদ ষ্টেট্সনা চাইনাগা লল্লোন- ইতীক তৌনবগী মতাঙদা চত্থরকখিবা টারিফ ৱাংখৎনা, কা হেন্না লৌবগী থৌওং অদূদগী খোঙফম হন্দোক্লগনি হায়বগী ইঙ্গিৎ অমা হন্দক য়ু এস প্রসিদেন্ট দোনাল্ড ট্রম্প না পীরকখিবগা লোয়ননা বৈজিংনসু পোজিটিব ওইবা গ্ৰিন সিগনেল পীরকখ্রে। য়ু এসনা চাইনাগী লল্লোনপোৎশিংদা কা হেন্না টারিফ লৌরম্বা থৌওং অদূ হন্দোরকপগী ফীভম লৈরবদি চাইনানসু য়ু এসকা লল্লোন- ইতীক তৌননবা ৱারী শাননীংবগী অপাম্বা লৈ। মদূগীদমক থোঙ লাওনা হাংদোক্লে হায়না ফোঙদোরকখ্রে।

অদূম ওইনমক ট্রম্প এদমিনিষ্ট্রেসন্না মখাতানা টারিফ হেনগৎপগী খোঙফম হন্দোক্তবগী ফীভমগা লোয়ননা থ্রেট তৌদুনা লৈবা তারবদি ট্রেদ টোল্ক চত্থবগী ৱাফম অসী খন্ননিঙায় ওইদে হায়না চাইনানা ফোঙদোরক্লি। মার্কেট ভোলেটাইলিটি অমা বৈজিং অমসুং ৱাশিংটন অনীগী মরক্তা লৈরকখিবা চৈরক্তা য়ু এসনা চাইনাগী লল্লোনপোৎশিংদা কা হেন্না টারিফ লৌরিবা অদূ শীঙথানিঙায় ওইবা থাক্তা হন্থহন্দুনা লৈবাক অনীগী মরক্তা য়ানবা ফীভম অমা শেমগৎনবা হোৎনরি হায়না মমাঙগী চয়োলদা প্রসিদেন্ট দোনাল্ড ট্রম্পনা ফোঙদোরকখিবনি।

চাইনাগী লল্লোনপোৎশিংদা য়ু এসনা টারিফ ৱার অমা লোঞ্চ তৌখিবা অদূগী মতাংদা চাইনাগী খোঙথাঙ তশেং তশেংনা লৈরি। ঐখোয়না ফাইট তৌনবা পামদে, অদুগা মদূবু কিবসু লৈতে। করিগুম্বা ঐখোয়না লান্থেংনরকপা তারবদি অরোয়বা থাক্তুফাওবদা লান্থেংনগনি, মরক্তা তোকপদি তৌরোই অদুগা য়াশিন্নবা পুরকশি হায়রবসু মদুগীদমক থোঙ য়াম্না লাওনা হাংদোক্লে,  ৱারী শানবদা অকায়বা করিসু লৈতে হায়না চাইনাগী ফোরেন মিনিষ্ট্রিগী ৱাঙাংলোয় গুও জ্যাকুন না নুংতিগী পাঙথোকপা প্রেস কনফরেন্স অমদা হন্দক ফোঙদোকখি।