প্রাইম মিনিষ্টর নরেন্দ্র মোদিনা লৈবাক অসীগী অৱাং নোংপোক লমদম চাওখৎননবা হনবা লৈতনা হোৎনরক্লি, লম্বী-থোং, ইনফ্রাষ্ট্রকচর অমসুং মরুওইবা প্রোজেক্ট কয়াগী থবক-থৌরমশিং মথঙ-মথঙ পায়খত্তুনা লাক্লি। পূম্নমক অসী য়েংলুরগা লমদম অসীগী মীয়াম্না পি এম মোদিবু থাগৎফম থোকপনি হায়না য়ুনিয়ন মিনিষ্টর কিরেন রিজিজুনা ফোঙদোকখিবা ৱাফম অমগী মতাংদা কংগ্রেস পার্টিনা অঙকপা ফোঙদোরকখিবগা লোয়ননা বিজেপি না থায়নদগী হৌনা মীয়ামদা ওইদা-পাদবা ৱাফম কয়া হায়জীন্দুনা মীনম্বা অমসুং তাৎ-পাৎকি থবকশিং চত্থদুনা লাক্লি, কিরেন রিজিজুগী ৱাফম অসীসু মদূমক্নি, করিশু অঙকপা নত্তে হায়খ্রে।
প্রাইম মিনিষ্টরনা লম্বী- থোং শেম্লে, ইনফ্রাষ্ট্রকচর শেমগৎলি, মীয়ামদা থবক পীরে হায়রিবসিদি কন্সটিট্যুসনগী মখাদা মীয়ামগী মীহূৎশিংনা শেম্বা লৈঙাক অমনা শোয়দনা তৌফম থোকপা মথৌনি। মদূদি ৱা ওইনা থাবা য়াবা নত্তে। অসিগুম্বা, লৈঙাক অমনা পায়খৎফম থোকপা থবক- থৌরম খরগী মতাংদা য়াম্না লূম্না লৌদুনা মীয়াম্বু অপঙবা শীগদবা নত্তে। ঙসীগী মালেমসিদা কনাসু অপঙবা লৈত্রবনি হায়বসি বি জে পিনা খঙজীনবা ফৈ হায়না কংগ্রেস পার্টিগী লুচিংবা রাজেশ কুমার সেথীনা করেম্নখ্রে।
ওল ইন্দিয়া কংগ্রেস কম্মিটি, মাইনোরিটি দিপার্টমেন্টকি নেস্নেল কোর্দিনেটর ওইনা থৌ পুরিবা শেথী না মখাতানা হায়, অৱাং নোংপোক্কি মীয়াম অসী অপঙবনি খল্লিবা বী জে পিগী ৱাখল্লোন হোংদোকপা মতম য়ৌরে হায়বসি বি জে পিগী লুচিংবশিংনা খঙজীনবা ফৈ। সোসিয়েল মেদিয়াদা মথোঙ-মরম খঙদবা মওংদা বি জে পিনা পঙলাও লাউরগা, দেমো খরা তৌশিন্নরগা মীয়ামগী পূক্নীঙ-ৱাখল হুমদুনা পুবা য়ারোই। মদূ লুচিংবা অমগী মগুন নত্তে হায়খি।মীয়াম্না অৱাবা তারবদা ঐ লৈরি হায়দুনা লেপ্তুনা লৈরিবা মীশক্তু মীয়ামগী অশেংবা লুচিংবনি হায়খি।মনিপুরগী মীয়াম্না চহী অনী হেন্না অৱাবা তাদুনা লাক্লিবসিদা খঙশীন- উশিন্নদনা, লৈথোক্তুনা লৈরিবা নরেন্দ্র মোদিবু মতৌ করম্না মীয়ামগী লুচিংবা কৌগদৌরিবনো হায়না শেথীনা ফোঙদোকখি।
