অথৌবা মহৈরোয়শিংগী নীঙশীং থৌরম-২০২৫ এম এস এফনা শীন্দূনা পাঙথোক্কদৌরি

হৌখিবা কুমশিং ২০০৪ গী আগষ্ট ১৫ দা মনিপুরি ষ্টুডেন্টস ফেদরেসন ( এম এস এফ) কি অচঙবা থৌমী মহৈরোয় পেবম চিত্তরঞ্জন না আফস্পাগী মায়োক্তা অকনবা খোঙজঙ চঙশীনখিবগা লোয়ননা মশা- মথন্তা মৈ থাজরগা লমদমশিগী নৈহৎপীরবা মীয়ামগী মহূৎ শিন্দুনা মথঙ নুমিৎ আগষ্ট ১৬ তা লৈখিদবা নুমিৎপু নীঙশীংদুনা এম এস এফ না অথৌবা মহৈরোয়শিংগী নুমিৎ- ২০২৫ কি থৌরম পাঙথোক্কনি হায়রি।

হন্দক পাঙথোক্কদৌরিবা নীঙশিং থৌরম অসীনা ২১ রক শুবনি। মহৈরোয় লূপ অসীগী প্রসিদেন্ট হিজম রোসন্না খূৎয়েক পীদুনা থাদোরকপা চেরোল অমদা হায়, মনিপুর য়াওনা অৱাং নোংপোক লমদমদা ইন্দিয়া লৈঙাক্না দ্রাকোন্নিয়ন লো অমা ওইরিবা আর্ম ফোর্সেস স্পেসিয়েল পাৱর্স এক্ট ( আফস্পা), ১৯৫৮ থমজিল্লক্তুনা লমদম অসীগী নূপী অঙাঙ কয়াগী ইজ্জৎ খোঙ্গোয়নরকপা, মীহাৎ-মীপূনশিং পাক-শন্না চত্থরকপগী মায়োক্তা খোঙজঙ চঙশীন্দুনা, লমদম অসীদগী আফস্পা অসী মতম পূম্বগী ওইনা লৌথোকখিগদবনি, ঐখোয় অকি-অখঙ য়াওদনা, নীঙতম্না হিংগদবনি হায়বা পাউজেল পুদুনা অথৌবা চিত্তরঞ্জন না কত্থোকপগা লোয়ননা চঙশীনখিবা খোঙজঙ অদুবু ঈকায়খুম্নবা ঊত্তুনা এম এস এফনা চহী খূদীঙগী আগষ্ট ১৬ তা অথৌবা মহৈরোয়শিংগী নুমিৎ অসী লেপ্তনা পাঙথোক্তুনা লাক্লি হায়রি।

আগষ্ট ১৬ কি অয়ূক পূঙ ৫  তাবদা ইম্ফাল নোংচূপ পানাগী ক্বাকৈথেল থৌনাউজম লৈকায়দা লৈবা এম এস এফকি হেদ ওফিস্তা য়াকায়রোল শক্তুনা থৌরম হৌদোক্কনি। মথঙদা বিষ্ণুপুর দিষ্ট্রিক্টকি থানিল লৈকায়দা লৈরিবা অথৌবা মহৈরোয়শিংগী নীংশীং খূভমদা লৈবা অথৌবা চিত্তরঞ্জনগী মিতমদা হৈকৎ- লৈকৎ তমগনি। মসীগী মতূঙদা বিষ্ণুপুর কৈথেলদা লৈরিবা মহাক্কি য়াতাফমদা মীয়াম্না হৈকৎ-লৈকৎ তমগনি হায়রি।