অঙনফৌ লৌরোক লোইদ্রিফাওবা সনাতোম্ববু ট্রান্সফর তৌবিগনু: লৌমীশিং

হৌখিবা চহী অনী অসীদা মতম চাদনা ঈশীঙ-ঈচাও থোকপদগী ইম্ফাল ইষ্ট দিষ্ট্রিক্টকি মনূঙচন্না লৈরিবা অন্দ্রো কেন্দ্রগী পোইরৌপাৎ লৌকোল অসী থংনা-থংননা লৌ পানবা য়াদনা লাকখ্রবা মতূঙদা হন্দক মরী লৈনবা দিপার্টমেন্ট শিংগী মতেঙগা লোয়ননা অঙনফৌ থাবা হৌরক্লি। চৈরকশিদা অহানবা লৌরোক ফংননবা লৌমীশিংনা অহানবা ওইনা, এক্সপিরিয়েন্স কয়া লৈতনা, হৈতা-হৈতনা হোৎনজরিবা অসীদা ঙাইহাক লৈতনা ফীল্ডদা কূমথরক্তুনা য়েংশিনবিবগা লোয়ননা অঙনফৌ থাবগী মতাঙদা লৌশিং -গ্যান পীবিরিবা অমসুং মতম-মতমগী পোৎলমশিং পীবীরক্তুনা মতেঙ পাংলিবা এগ্ৰিকলচর দিপার্টমেন্ট গী এসিষ্টেন্ট ফর্তিলাইজর ওফিসার এল সনাতোম্ববু ট্রান্সফর তৌরক্লিবা লৈঙাক্কি অদূ অন্দ্রো মায়কৈগী মীয়াম অমদি লৌমীশিংনা য়াবা ঙম্লোই হায়না লমদম অসোমগী লৌমীশিংগী সোসাইটিনা লৈঙাক্কি পূক্নীং চিংশিল্লক্লি।

পোইরৌপাৎ লৌকোল ফারমর্স দেভেলপমেন্ত কো-ওপরেটিব সোসাইটি লিমিটেদকি থৌমীশিং, মায়কৈ অশোমগী লৌমীশিং অমদি পাউমীশিংগী অপূনবা টিম অমনা পোইরৌপাৎ লৌকোলদা অঙনফৌ লৌফম শঙম ১০০ রোম হেনবদা থারিবা অদূগী ফীভম য়েংশিনখিবা খোঙচৎ অমদা সোসাইটি অসীগী সেক্রেটরি খুল্লেম তোমচৌনা ৱাফম অসী ফোঙদোকখিবনি।

মহাক্না হায়, মতম শাংনা ঈশীঙ ঈচাওনা মরম ওইদুনা লৌ উরক্ট্রবা লৌকোল অসীদা অঙনফৌগী পোত্থোক পুথোকপা ঙম্ননবা লৌমীশিংনা হায়জরুবদা মনিপুর লৈঙাক্কি এগ্ৰিকলচর অমদি ৱাটর রিছোর্সেস দিপার্টমেন্ট অনীনা মথৌ তাবা পোৎলমশিং পীবীরক্তুনা অহানবা ট্রাইয়েল ওইনা অচনফৌগী পোত্থোক পুথোক্নবা হোৎনরক্লি।হীরম অসিদা চাউনা লৌমীগী মতেং পাংদুনা লাক্লিবা এগ্ৰি ওফিসার সনাতোম্ববু ট্রান্সফর তৌরে হায়বা লৈঙাক্কি ওর্দর অসী লৌমীশিংনা য়াবা ঙম্লোই। অঙনফৌ লোকপা মতম হায়বদি লাক্লিবা জুনগী অহানবা চয়োল ফাওবদি মহাকপু ট্রান্সফর তৌবিগনু হায়না তোমচৌনা ফোঙদোকখি।