অমুর ফালকোন মপান লৈবাকশিংদগী পাইরকপা হৌরকপগা লোয়ননা ফাবা-য়োনবা থিংখ্রে

Add New Post

চহী খূদিংগী মালেমগী কা হেন্না ঈংবা মফমশিংদগী মনিপুরদা সেপ্তেম্বর, ওক্তোবর থাদা পাইরক্লগা তমেংলোং দিষ্ট্রিক্টকি অশুকপা উমং-ৱামং, অৱাংবা চীঙজাওশিংদা মতম শাংনা চাক্তাদুনা লৈরবা মতূংদা অঈং-অশা হোংলকপগা লোয়ননা মীরমদা অমুক মতম নাইনা পাইখিবা অতাঙবা মখলগী অমুর ফালকোন হায়না খঙনরিবা, মীরম লান্না চাক্তাবা উচেক মখল অদূ হৌজিক নিংথমথা চঙলকপগা লোয়ননা মনিপুরদা পাইরকপা খরা-খরা হৌরক্লে। তমেংলোংগী অঈংবা চীঙজাওশিংগী উসাশিংদা শঙ্গু শঙ্গু তোংদুনা চাক্তাবা হৌগদবা মতমনা লাক্লিবা ওক্তোবর থাগী অনিশুবা চয়োলদগীনি।

মনিপুরদনা কহুৱাই পুইনা হায়না মমীং থোল্লিবা অমুর ফালকোন অসী ফাবা, য়োনবা অমসুং মখল খূদিংমক্কি শাদানবগী থৌওং খূদীংমক অথিংবা থম্লে হায়না ষ্টেট লৈঙাক্না লাউথোকখ্রে। মতম নাইনা ময়ূম হোংদোক হোংজিন তৌদুনা চাক্তাবা উচেক মখল অসি ফাবা, হাৎপা, য়োনবনচিংবগী থবক-থৌওং খূদীংমক ৱাইল্ড লাইফ প্রোটেক্সন এক্ট, ১৯৭২ গী সেক্সন ৫০ অমসুং ৫১ গী মতূং ইন্না অকনবা চৈরাক ফংনিঙাই ওই হায়রি। তমেংলোং দিষ্ট্রিক্টকি মনূংচন্না লৈরিবা মীয়াম্না পায়নরিবা, শাদানবদা শীজিন্নবা য়াবা মখল খূদীংমক্কি এয়র গনশিং মরী লৈনবা দিষ্ট্রিক্ট ওথোরিটিশিংদা খূদক্তগী দিপোজিৎ তৌননবা দিষ্ট্রিক্ট অসীগী মেজিষ্ট্রেটকি ওর্দর অমনা খঙহনখ্রে।

মহৌশাগী ওইনা অমুর ফালকোন হায়রিবা উচেক মখল অসী চহী খূদিংগী মনিপুরদা ওক্তোবর থাগী অনীশুবা চয়োলদগী পাইরক্লগা নবেম্বর থাগী অরোইবা অমসুং দিসেম্বরগী অহানবা চয়োলফাওবা লৈরম্লগা মীরমদা অমুক পাইখিবনি।দিষ্ট্রিক্ট মেজিষ্ট্রেটকি অথিংবা অদু তমেংলোং খূঞ্জাও, নমতীরাম, চিয়ুলুৱাং, কাংচিংলুৱান, দুইগাইনলোং, তমেংলোং টাউন, বমগাইজাংনচিংবা মফমশিংদা চৎনগনি অদুগা নোনে দিষ্ট্রিক্টকি তমেংলোং গা তাইনবা মফমশিংদসু অথিংবা অদু চৎনগনি হায়রি।