অমজুগী মীখলদা মায় পাক্লবশিং তরাম্না ওক্তুনা সার্টিফিকেটশিং য়েন্থোকখ্রে আসেম ভক্তনা প্রসিদেন্ট ওইরগনি

ওল মনিপুর  ৱার্কিং জর্নেলিষ্ট য়ুনিয়ন ( অমজু) গী কুমশিং ২০২৫- ২৬ কি ওইনা থৌ পুগদবা মীওইশিং খন্ননবা মীখল চৎলিবা মে থা অসীগী অমদা ইম্ফালদা লৈরিবা মনিপুর প্রেস ক্লবতা পাঙথোকখ্রে। মীখল অদূগী রিজল্ট সু নুমিৎ অদূমক্তদা লাউথোকখিবগা লোয়ননা মীখলদা মায় পাক্লবশিং তরাম্না ওক্তুনা সার্টিফিকেটশিং য়েন্থোকখ্রে।

মীখল অদূগী রিটর্নিং ওফিসার ওইখিবা দি আই পি আরগী হান্নগী দিরেক্তর মেঘচন্দ্র কোংবম্না মায় পাক্লবশিং অদুদা শকখঙচে/সার্টিফিকেটশিং খূৎশীন্নখ্রে। প্রসিদেন্ট মীরেপশিং ওইনা পোক্নফম পাউচেগী এসোসিয়েট এদিটর বিজয় ককচীঙতাবম অমসুং হায়দরাবাদ হেদলাইন্স পাউচেগী ইম্ফাল করেস্পোন্দেন্ট আসেম ভক্ত অনীনা মীরেপ ওইনা লম্বা থেংনখি। মীখল অদুদা আসেম ভক্তনা পূন্না ভোৎ মশীং ১৯২ ফংদুনা মায় পাকখি। বিজয় ককচীঙতাবম না ভোৎ মশীং ১৪৪ ফংদুনা মায়থীহৌখি।

অমজুগী অপূনবা মেম্বর ৩৭০ লৈবগী মনূঙদা মেম্বর ৩৪০ না ভোৎ থাদনখি। প্রসিদেন্ট মীখলদা ভোটর মরি, ষ্টেন্দিং কম্মিটিগী মীখলদা ভোটর মঙা ইনভেলিদ ওইখি। ষ্টেন্দিং কম্মিটিগী মীখলদা মায় পাকখ্রবশিংদি – ঈচেল এক্সপ্রেসকি পাউমী হাওবম প্রবিনকুমার, ফংখিবা অপূনবা ভোৎ মশীং- ১৫৬,পাউজেল পাউচেগী পাউমী থীংবাইজম লখিকান্তা- ১৯০, কংলৈপাক্কি মৈরাগী পাউমী সুরজ চনম-১৩৬, ইম্ফাল টাইমসকি কোন্থৌজম গিতা  – ১৯৮,পোক্নফমগী সোরেন্সংবম সোনিয়া-১৫৮, আই এস টি ভিগী খ্বাইরাকপম নাউবা-১৫৫,এলাংবম ওজিৎকুমার এল্লাইজ মুসুক-২২৯, ঐখোয়গী পন্থুং গী লৈমপোকপম সঞ্জিৎকুমার এল্লাইজ ভক্ত-১৫৭, হায়রিবশিং অসিনি। ষ্টেন্দিং কম্মিটিগী মীখলদা মীরেপ ১২ না লম্বা থেংনবদা মীরেপ ৮ অসী মায় পাকখিবনি।