অমিট শাহা, বিরেন অনিমক্না মরৈ অনী লোঙদুনা ঙাইহাক ঙাইহাক্কি ৱাফম ফোঙদোকপনা মনিপুরগী মীয়ামদা চম্মম্নবা পোকহল্লে: মেঘচন্দ্র

য়ুনিয়ন হোম মিনিষ্টর অমিট শাহা অমসুং ষ্টেট অসীগী চিফ মিনিষ্টর নোংথোম্বম বিরেন- লুচিংবা অনী অসীনা মনিপুরদা থোক্লিবা হীংশা অসীগী মতাংদা ঙাইহাক ঙাইহাক্কি ৱাফম ফোঙদোকপনা মনিপুরগী মীয়ামদা চম্মম্নবা কয়া মায়োক্নহল্লে। মখোয়গী থৌওংশিং অসী য়াম্না কিনিঙাই ওইরে। মনিপুরগী থোক্লিবা হীংশাগী ঈরাঙ অসী করম্বা মায়কৈরোমদা পুথোক্ননবা হোৎনরিবনো হায়বসি মীয়ামগী পূক্নীঙ ৱাখলদা চিংনবা ফাওনরক্লে হায়না মনিপুর প্রদেস কংগ্রেস কম্মিটি (এম পি সি সি) গী প্রসিদেন্ট কৈশাম মেঘচন্দ্রনা ফোঙদোকখ্রে।

মনিপুরদা থোক্লিবা হীংশাগী ঈরাঙ অসী মপান্দগী আইন কায়না মনিপুরদা চঙশীল্লকপা খূৎলায় পায়বা অমসুং পায়দবা টেরোরিষ্ট অমদি ইল্লিগেল ইম্মিগ্ৰেন্টশিংনা থোকহনবনি হায়না য়ুনিয়ন হোম মিনিষ্টর অমিট শাহানা মমাঙদা পাঙথোকখিবা পারলিয়ামেন্ট মীফমদা ফোঙদোকখ্রবনি।  মসিগী মখা তারকপদা ম্যান্মারগা তাইনরিবা ইন্টরনেস্নেল বোর্দর অসী মতমগা চানবা মওংদা ফেন্সিং তৌরগনি হায়না ৱারেপ লৌখিবগা লোয়ননা সেন্টর লৈঙাক্না বোর্দর অসী ফেন্সিং তৌবসু হৌখ্রে, হৌজিকসু থবক অসী চত্থরগা লৈরি।

চৈরকসিদা হোম মিনিষ্টর অমিট শাহানা মনিপূরগী ঈরাঙ অসী কাঙলূপ অনীগী মরক্তা থোকপা ঈরাংনি, সোল্যুসন অমা পুরক্নবা হোৎনরি হায়রিবসি করি করম্বা অরোনবা এজেন্দাগী মখাদা মরৈ অনী লোঙলক্লিবনো হায়বসি য়াম্না মিপাইনিঙায় ওইরি হায়না ঙরাং ইম্ফালগী কংগ্রেস ভাবন্দা পাঙথোকখিবা পাউমীশিংগা উনখিবা থৌরম অমদা মেঘচন্দ্রনা ফোঙদোকখি।মনিপুরগী চিফ মিনিষ্টর অসীসু মতম মতমগী অমসুং ঙাইহাক ঙাইহাক্কি মীয়াম্না তানীংগদবা ৱাফম থিদুনা লৈরি হায়না ফোঙদোকখিবগা লোয়ননা মনিপুরগী চিফ মিনিষ্টর অসীসু মকোক চাকপগুম তৌরি হায়খি।