এ আই আর ইম্ফাল লিংখৎখিবগী দাইমন্দ জুবিলি থৌরম পাঙথোকখ্রে

ওল ইন্দিয়া রেদিও(এ আই আর) ইম্ফাল লিংখৎখিবগী চহী ৬০ মপূঙ ফারকপা দাইমন্দ জুবিলি গী থৌরম চৎলিবা নবেম্বর থা অসীগী মঙাদা ইম্ফালগী পেলেস কম্পাউন্দা লৈবা সিতি কনভেন্সন সেন্টরদা মনিপুরগী গভর্নর অজয় কুমার ভাল্লানা অথোয়বা মীথূঙলেন ওইদুনা পাঙথোকখ্রে। থৌরম অদুদা ৱা ঙাঙবদা গভর্নরনা হায়,এ আই আর ইম্ফালগী ষ্টাফ অমসুং ওফিসিয়েলশিংনা থম্মোয় শেংনা অমদি অখাঙ কন্না হোৎনরকপগী মহয়না ঙসিদি ঈ -পাউ মীয়ামদা ফংহল্লিবা য়াম্না মরূওইরিবা মেদিয়ম অসীনা মীয়ামগী পুন্সিদা পূক্নিঙ -ৱাখল নুঙাইহনবা,অহল ওইরবশিংগী পূক্নীঙ লৈতাহনবদা অচৌবা মতেং পাংবা ঙম্লে।

কাঙলূপ,ফূরূপশিংগী মরক্তা অপূনবা শক্তম শাগৎনবা,নুংশি -চান্নবা অমসুং লৈবাক্কি ইম্মোস্নেল য়ুনিটি অমদি ইন্টিগ্ৰিটি পুরক্নবা মওংদা পাউমীশিংনা মীয়ামদা পাউ শন্দোক্কদবনি।সেন্সিটিব ওইবা ইস্যুগা মরী লৈনবা পাউ মীয়ামদা ফংহন্ননবা হোৎনবদা চেকশীনবগী তঙায়ফদবা য়াম্না লৈ।পাউমীশিংনা চেকশীলহৌদবদা কাঙলূপ মশেল য়েংথীনরকপা য়ারিবনি,লৈবাক কাং -খোং চাইহনবসু য়ারিবনি।

মরম অদুনা অসীগুম্বা থৌদোক ৱাথোকশিংগী পাউ ফোঙলমদাইদা মেদিয়াপার্সনশিংনা মুন্না খন্থগদবনি হায়না গভর্নর না ফোঙদোকখি।এ আই আর ইম্ফালনা ঙসীদি মনিপুরখক্তা নত্তনা মালেমগী মীয়ামদা মতম মতমগী অৱা -নুঙাইগা মরী লৈনবা,শেল -থুমগী,রাজনিটিগী,শান্ন -খোন্নবগী,খুনাইগী অমসুং স্পিরিচুয়েলগী ওইবা লৌশিং গ্যান মরীকচূম্না পীদুনা লাক্লি হায়খি।থৌরমদুদা মনিপুর লৈঙাক্কি এদ্দিস্নেল চিফ সেক্রেটরি অনুরাগ ভাজপায়ি,মনিপুরগী শক্নায়রবী ফোল্ক আর্টিষ্ট মংকা ময়াংলম্বম,তাংখুল কম্যুনিটিগী মরক্তগী শৈশকপা পদ্মশ্রি এৱার্দি রুবেন,এ আই আর ইম্ফালগী ষ্টাফশিং অমসুং ওফিসিয়েলশিংসু শরুক য়াখি।