মনিপুরগী চীঙ অমসুং তম্পাক্কি তোঙান তোঙানবা এরিয়াশিংদা ষ্টেট পুলিশ অমসুং সেন্ট্রেল সেক্যুরিটি ফোর্সনা খূৎশম্নরগা কোম্বিং ওপরেসন, সর্স ওপরেসন্নচিংবা চত্থদুনা মশীঙ য়াম্লবা বোম, নোংমৈ অমসুং অতৈ খূৎশু-খূৎলায় কয়ামরূম ফাগৎপগী থবক লেপ্তনা চত্থরক্লি।
মশীগী মখা তাবা খোঙথাঙ অমা ওইনা ঙরাংসু অয়ূক পূঙ ৬.৪০ রোম তারকপদা বিষ্ণুপুর দিষ্ট্রিক্ট পুলিসকি এস পিগী ওভরওল সুপরভিজন মখাদা দিষ্ট্রিক্ট পুলিসকি এদ্দিস্নেল এস পি (ওপস) না লুচিংদুনা পুলিশ কম্মান্দোশিং, ৩৩ শুবা আসাম রাইফলস, ৮ শুবা সি আর পি এফ বট্টালিয়নগী অপূনবা টিম্না ওইনাম সার্কলগী এগজিক্যুটিব মেজিষ্ট্রেটকা লোয়ননা চত্থখিবা কোম্বিং ওপরেসনদা য়াম্লবা খূৎশু-খূৎলায়শিং রিকোভর তৌখ্রে।
বিষ্ণুপুর দিষ্ট্রিক্টকি আইগেজাং এরিয়াদা চত্থখিবা কোম্বিং ওপরেসনদা ফংবা ঙমখ্রবা খূৎলায়শিং অদূদি- থ্রী নোট থ্রী রাইফল অমা, বোল্ট এক্সন রাইফল অমা, এস বি বি এল নোংমৈ অনী, মেগজিন অমগা লোয়নবা পোইন্ট ২২গী পিষ্টোল অমা, মেগজিন অমগা লোয়নবা নাইন এম এম পিষ্টোল অমা, হায়- এক্সপ্লোসিব হেন্দ গ্ৰেনেদ মঙা, চাইনিজ হেন্দ গ্ৰেনেদ অমা, লেথোদ গ্ৰেনেদ মরি, লোং-রেঞ্জ মোদিফাইদ মোর্টার সেল অমা, টু ইঞ্চ মোর্টার হায় এক্সপ্লোসিভ সেল অমা অমসুং অতৈ য়াম্লবা খূৎলায়শিংনি হায়রি।