মনিপুর পুম্বদগী শান্নরোয় ১৮০ চপ মান্নবনা নাৎ-চৎনবীগী মার্শাল আর্ত থাঙ-তাদা মখোয়গী মতিক ময়াই উৎলি

ভারতকী মাংজিল থাবা কঞ্জ্যুমর দ্যুরেবল ব্রান্দশিংগী মনুংদা অমা ওইরিবা উশা ইন্তরনেস্নেলনা, মলেম অপুনবা থাঙ-তা মহৈকোল (এম.এ.তি.এ.এম.)না নোবেম্বর ১৪ দগী ১৫ ফাওবা, ২০২৬দা মনিপুরগী ইম্ফাল ইস্তকী পৌরবী ময়াই লৈকাই প্লেগ্রাউন্দতা পাঙথোকখিবা অহুমশুবা স্তেত-লেবেল থাঙ-তা লালোং য়েন্দম্নবা তুর্নামেন্ত ২০২৬ দা ঙাক্লৌ পীখি। “থাঙ-তাগী মখাতাংদা চৎনবী-নাৎ ঙাক-শেন্নবা, অফবা মতিক মগুন চাউখৎহন্নবা অমদি নহাশিংবু পাঙ্গল পীবা” হায়বা থীম অসিগী মখাদা পাঙথোকখিবা তুর্নামেন্ত অসিদা স্তেত পুম্বদগী শান্নরোয় ১৮০ চপ মান্নবনা শরুক য়াখি। মসিনা নাৎ-চৎনবীগী মার্শাল আর্ত অসিদা মীয়ামগী থৌনা অমদি পাম্বা মখা চত্থরিবা উৎলি।

মনিপুরগী নাৎ-চৎনবী অমদি লান্মীগী চৎনবীদা মরু ফজনা য়ুম্ফম লৈরিবা থাঙ-তা হায়বা মমিং অসি মনিপুরী ৱাহৈ অনি – থাঙ (তলৱার) অমদি তা (বল্লম)দগী লাকপনি। শান্ন-খোৎনবা অসিদা খুৎলাইগী মখাতাংদা চৎলিবা মতৌশিং অমদি মশাবু ঙাক-শেনবগী মতৌশিং, হকচাং অনাবা, শরীরগী মরী লৈনবা মতৌ অমদি নীংথিনা চৎপা (দিসিপ্লিন) শুপ্নবা পুন্সিনহল্লি। মার্শাল আর্ত অমা ওইবগী মথক্তা, মসি মনিপুরগী য়েলহৌ মশান্নগী চৎনবী অমদি কলচরগী মশক খঙদোকপগী মরু ওইবা মওং অমা ওইনা লৈরি।

তুর্নামেন্ত অসিদা নাৎ-চৎনবীগী মার্শাল আর্তকী মখল কয়া অমদি কম্পিতিসনগী কেতেগোরী কয়া য়াওখি। মদুগী মনুংদা, ফুনাবা অমা (চেইবি অমদি চুং শিজিন্নদুনা লান্থেংনবা নাৎ-চৎনবীগী থৌরম)দা মিস্তর রেক্স কোইজম্না অহানবা মফম লৌখি অমদি মিস্তর থোইবা য়ুমনম্না অনীশুবা মফম লৌখি। ফুনাবা অনিশুবা (চেইবি অমদি চুং শিজিন্নদুনা পোইন্ত লৌবগী মখাদা লান্থেংনবা কম্পিতিতিব স্পারিং থৌরম)দা মিস ঐচ. বিদিয়ালক্সমী অমদি মিস লোয়ালেম্বী সোরম্না অহানবা অমদি অনীশুবা মফম লৌখি; অমদি থাঙ-তা দিমোন্সত্রেসন (নাৎ-চৎনবীগী মার্শাল আর্তকী মতৌশিং অমদি মতিক মগুন উৎপগী থৌরম)দা অঙকপা পর্ফোর্মেন্স উৎখিবা মিস ঐচ. বিদিয়ালক্সমী অমদি মিস্তর রেক্স কোইজম্না মথক্কী মফম অনি লৌখি। চহি অমদি ৱেৎ কেতেগোরী তোঙান-তোঙানগী নুপামচা অমদি নুপীমচাশিংগী মীয়াম অমা-অমাগী অমদি তীমগী কম্পিতিসনশিংসু পাঙথোকখি, অমদি মামাংদা লৈরবশিংবু মখোয়গী মতিক মগুনগীদমক থাগৎখি। (অকুপ্পা রিজল্ত মখাদা য়েংবিয়ু)

থৌশিল অসিগী মতাঙদা ৱা ঙাংলদুনা, মিস কোমল মেহরা, হেদ- স্পোর্তস ইনিসিএতিব এন্দ এসোসিএসন, উশা ইন্তরনেস্নেলনা হায়খি, “থাঙ-তা হায়বসি মার্শাল আর্ত অমা খক্তা নত্তে, মসি মনিপুরগী কলচরগী মশক খঙদোকপা অমদি নীংথিনা চৎপা অমদি মতিক মগুনদা য়ুম্ফম লৈবা চৎনবী অমনি, মসি চহি চামা কয়াগী মনুংদা মশাবু ঙাক-শেনবগী মওং অমা ওইনা শেম্বা অমদি চাউখৎলকপনি। মসি নহা মচাশিংনা মখোয়গী লন-থুমগা মরী শাদুনা খেলোয়াড় ওইনা চাউখৎপগী খুদোংচাবা পীবা প্লাতফোর্ম অমা ওইনা হেন্না চাউখৎলকপা উবা অসি থৌনা পীরবা ৱাফমনি। উশা প্লেগী মখাতাংদা, ঐখোয়না য়েলহৌ মশান্নশিংবু হেন্না মীয়ামগী মমাংদা পুথোক্নবা অমদি মীয়াম্না পাম্নবা ওইহন্নবা, লমদমগী মতিক লৈবা মীশিংবু য়েংশিন্নবা অমদি থাঙ-তাগুম্বা চৎনবীশিংবু হেন্না য়াম্লবা মীয়ামদা য়ৌহন্নবা থৌনা ফাওরি।”

রোসেন লোংজম্বা, কনভেনর, লালোং য়েন্দম্নবানা হায়খি, “থাঙ-তা হায়বসি মার্শাল আর্ত অমা খক্তা নত্তে; মসি মনিপুরগী কলচরগী মশক অমদি চৎনবী-নাৎকী হিংলিবা খুদম অমনি। তুর্নামেন্ত অসিগী মখাতাংদা, নহা মতিক লৈবশিংদা প্লাতফোর্ম অমা পীবা, চৎনবী-নাৎকী মশান্নশিংদা হেন্না শরুক য়ানবা থৌনা পীবা অমদি মমল য়াম্লবা য়েলহৌ লনমশিং অসি ঙাক-শেন্দুনা মতুংগী মীরোলশিংদা য়ৌহনবা হায়বসি ঐখোয়গী পান্দমনি।”

হৌদোকপা থৌরমদা মীথুং কয়া শরুক য়াখি, মদুগী মনুংদা শ্রী পুখ্রম্বম বিলাস, দাইরেক্তর, জৱাহরলাল নেহরু মনিপুর দান্স একাদেমী (জে.এন.এম.দি.এ.), ইম্ফাল; শ্রী সাইকত নাস্কর, রিজনেল মেনেজর, উশা ইন্তরনেস্নেল লি.; শ্রী কৈথেলাকপম বসন্ত মৈতৈ, প্রেসিদেন্ত, এম.এ.তি.এ.এম.; শ্রী অথোকপম ওজেন্দ্র মৈতৈ, স্তেত এৱার্দী; শ্রী এন. সৈলুং মৈতৈ, প্রেসিদেন্ত, পৌরবী দিভেলপমেন্ত কমিতী; শ্রী এল. মাইপাক মৈতৈ, প্রেসিদেন্ত, পৌরবী রাইজিং স্তার ক্লব; শ্রী এন. ইবোমচা মৈতৈ, সেক্রেতরী, পৌরবী দিভেলপমেন্ত কমিতী; শ্রী রোসেন লোংজম্বা, গুরু অমদি ঐচ.ও.দি., থাঙ-তা, জৱাহরলাল নেহরু মনিপুর দান্স একাদেমী (জে.এন.এম.দি.এ.), ইম্ফাল; অমদি শ্রী তি.ঐচ. বিরমঙ্গোল সিংহ, সেক্রেতরী, পীপল্স দিভেলপমেন্ত সোসাইতী (পি.দি.এস.) য়াওখি।
লোইশিনবা থৌরমদা প্রো. কননবালা সারংথেম, ভাইস-চান্সেলর, মনিপুর য়ুনিভর্সিতী অফ কলচর; শ্রী সাইকত নাস্কর, রিজনেল মেনেজর, উশা ইন্তরনেস্নেল লি.; শ্রী কৈথেলাকপম বসন্ত মৈতৈ, প্রেসিদেন্ত, এম.এ.তি.এ.এম.; শ্রী অথোকপম ওজেন্দ্র মৈতৈ, স্তেত এৱার্দী; অমদি শ্রী তি.ঐচ. বিরমঙ্গোল সিংহ, সেক্রেতরী, পীপল্স দিভেলপমেন্ত সোসাইতী (পি.দি.এস.)না শরুক য়াখি।

থাঙ-তাগা লোয়নবা অসিনা ভারত পুম্বদা মশান্নগী মখল কয়াদা, মরু ওইবা মশান্নশিং অমদি য়েলহৌ মশান্নশিং অনিমক্তা, উশা প্লেনা পাঙথোক্লিবা থবকশিং হেন্না অকনবা ওইহল্লি। মসিগী স্পোর্তস পোর্তফোলিওদা মুম্বাই ইন্দিয়ন্স ফ্রেনসাইসীগা লোয়নবা, অল্তিমেৎ ফ্লাইং দিস্ক, গোল্ফ, শরীরদা অৱাবা লৈবা মীশিংগীদমক ক্রিকেত, অমদি মিৎ য়েংবা ঙমদবা মীশিংগীদমক এথ্লেতিক্স অমদি মার্শাল আর্তস য়াওরি। উশানা মল্লখম্ব, সিয়াত খ্নাম, য়োগা, থাঙ-তা, সাজ-লোং, সতোলিয়া/পিথু অমদি কলারিপয়াত্তু অসিনচিংবা চৎনবী-নাৎ অমদি লমদমগী মশান্নশিং হেন্না মীয়ামগী মমাংদা পুথোক্নবা থবকসু তৌরি।

Leave a Reply

Your email address will not be published. Required fields are marked *