বি জে ৱাই এমনা এম পি বিমোল ফম থাদোক্কদবনি হায়না প্রোটেষ্ট তৌখ্রে, পুৱারিদা খ্বাইদগী নোক্নীংবা থৌদোকনি হায়খ্রে

ভারতিয়া জনতা য়ুব মোরচা (বি জে ৱাই এম) না শীন্দুনা ঙরাং ইম্ফালগী বির টিকেন্দ্রজিৎ রোদতা লৈবা কংগ্ৰেস ভবন মমাঙদা এম পি বিমোল ফম থাদোক্কদবনি হায়বা খোল্লাউশিং লাউরদুনা অকনবা খোঙজঙ অমা চঙশীনখ্রে।
মশীং য়াম্লবা বি জে পিগী থৌমীশিং অদুনা নিত্যাইপাৎ চুথেক্তা লৈবা বিজেপি মণিপুরগী থম্বাল শঙলেন্দা পূল্লবা মতূঙদা বি টি রোদতা লৈবা কংগ্ৰেস ভবন তম্না খোঙচৎ অমা চৎখি। “নূপী মহৈরোয়শিংদা অচূম্বা ৱায়েল ফংহল্লু, ঐখোয় ঈং-তপ্পা পাম্মি, অচূম্বা ৱাফম পুথোকউ, মনিপুরগী ঈকায়খুম্নবা মাঙহনবা য়ারোই,” হায়না ইবা প্লেকার্দ কয়ামরুম বি জে ৱাই এমগী থৌমীশিং অদুনা শীজীন্নখি।
নাকল অমরোমদা, মনিপুর প্রদেশ কংগ্রেস কম্মিটিগী মেম্বরশিংনা কংগ্ৰেস ভবন মমাঙদা লেপ্লগা বিজেপিগী মায়োক্তা খোল্লাউ কয়া লাউশিনখি। প্রোটেষ্ট তৌখিবা বি জে ৱাই এম গী য়াম্লবা থৌমীশিং অদূ কংগ্ৰেস ভবন্দা চঙখিদনবা পুলিসনা অকনবা মওংদা চেকশীন-থৌরাং লৌখৎখি। এম পি বিমোলগী মথক্তা সেক্সুএল হরাসমেন্টগা মরী লৈননা মরাল শীরকখিবা অসীগী মতাঙদা কংগ্ৰেস লুচিংবা রাহুল গান্ধী অমসুং অতৈ পার্টীগী মকোক থোংবশিংনা ঙসী ফাওবা ৱা অমত্তা ঙাঙদনা তূমিন্না লৈশিল্লিবসি অঙকপা পোকই হায়না বি জে ৱাই এমগী মেম্বর অমনা ফোঙদোকখি।
অমরোমদা, এম পি সি সিগী জেনরেল সেক্রেটরি এন পোপিলালনা, বি জে ৱাই এমগী থৌওং অদূ য়ানীংদবা ফোঙদোক্তুনা, মদূ মনিপুরগী পুৱারিদা খ্বাইদগী অঙকপা অমসুং নোক্নিংবা খোঙচৎনি হায়না ফোঙদোকখ্রে। এম এল এ ৫৫ লৈবা রুলিং পার্টিনা, সূপ্নগী এম এল এ ৫ খক লৈবা ওপ্পোজিসন কংগ্ৰেসতগী অচূম্বা ৱায়েল পীয়ূ হায়না দিমান্দ তৌরিবসিদগী হেন্না অঙকপা অমা লৈররোই হায়না ফোঙদোকখি।