নাগা ষ্টুদেন্টস য়ুনিয়ন, মুম্বাই (এন এস য়ু এম) না শীন্দুনা ৫৫ শুবা “নাগাজ মিট -কম -ফ্রেসর্স ডে” গী থৌরম মুম্বাইদা পাঙথোকখ্রে।য়ুনিভর্সিটি ওফ মুম্বাইগী অলকেস দিনেস মোদি ওদিটোরিয়মদা থা অসীগী ১০ দা পাঙথোকখিবা থৌরম অদুদা ৱার্কিং প্রোফেস্নেল, মহৈরোয়, অহল অমদি ঈমূঙ-মনূঙগী মীওইশিংনা শরুক য়াখি।
থৌরম অদূ নাগা কম্যুনিটিগী আইদেন্টিটি ঙাক্তুনা থম্বা, অহোংবা কয়া লাক্লিবা ঙসীগী মালেম অসিদা হৌগৎলক্লিবা নাগা ফূরূপকি নহারোলশিংনা ফূরূপ অসীগী থায়নদগী চৎনদুনা লাক্লিবা নাৎ, ট্রেদিসন অমসুং কলচরগী তোমথিন ওইনা লৈজরিবা শক্তমশিং অদু য়োকখৎতুনা, ঙাক-শেন্দুনা থম্ননবগী পান্দমগা লোয়ননা পাঙথোকখিবনি।
এন এস য়ু এমগী প্রেসিদেন্ট ওইনা থৌ পুরিবি মেয়িসেনলা লেমটরনা থৌরম মপূগী ৱেলকম এদ্রেস পীখিবগা লোয়ননা মুম্বাইদা নাগা কম্যুনিটিগী শক্তম কায়হন্দনা থম্ননবা, এন এস য়ু এমগী য়ূম্ফম থোনবিরম্বা লময়ানবশিংগী মফমদা ঈকায় খুম্নবা ঊৎখি। য়ুনিভর্সিটি অদুদা নৌনা চঙলকপা নাগা ফূরূপকি মহৈরোয়শিংনা কম্যুনিটি অসীগী য়াইফনবা, চাওখৎনবা অশানবা মীৎয়েং অমমমগা লোয়ননা থবক তৌবিরক্নবা মহাক্না আপিল তৌখি। এন এস য়ু এম হায়রিবা য়ুনিয়ন অসী মহৈরোয়শিং, প্রোফেস্নলশিং অমদি নহা-অহল খায়দনা, নাগাশিংগী ওইবা অপূনবা শক্তম ঙাক্নবা শেমখিবা বোদী অমনি হায়না মহাক্না মখা তানা ফোঙদোকখি।