সঙাই ইথনিক পার্কতা ৱার্ল্ড টুরিজম ডে থৌরম পাঙথোকখ্রে

ঙরাং বিষ্ণুপুর দিষ্ট্রিক্টকি মোইরাং খুনৌদা লৈরিবা সঙাই ইথনিক পার্কতা ৱার্ল্দ টুরিজম ডেগী থৌরম পাঙথোকখিবগা লোয়ননা চিফ মিনিষ্টর য়ূম্নাম খেমচান্দনা মনিপুরদা টুরিষ্ট লাকপগী মশীঙ কা হেন্না হন্থরকপা অসীগী মতাঙদা নুংনাংবা ফোঙদোকখ্রে। মনিপুরগী গভর্নর অজ‌য় কুমার ভল্লাসু শরূক য়াখিবা থৌরম অদুদা চিফ মিনিষ্টরনা হায়, লমদম অসিদা কুমশিং ২০২৩ গী মে অহুমদগী হৌরকখিবা হীঙশাগী ঈরাঙ অসীনা মরম ওইরগা ষ্টেট অসীদা জি এস টি কল্লেক্সনগী লূপা ক্রোর কয়ানা খূজিং ওইরগা মাঙজবা লৈরি। টুরিজম সেক্টরদা য়েংলবসু লৈঙাক্তা কারক্কদবা রেভিন্যুগী শেনফম চাউনা মাঙলে। ঈরাং অসী লাক্ট্রিঙৈ মতমদা টুরিজম সেক্টরদগী মনিপুরদা চহীগী ওইনা লূপা ক্রোর কয়ামরুম কারকপা ঙম্লম্মি অদুবু হৌজিক্তি রেভিন্যুগী শেনফম অসী হায়নিঙায় লৈতনা হন্থখ্রে।

মরম অদূনা তঙদূ-লৈতাদবা, কাঙলূপকি ঈরাং লৈবা, শান্তি লৈতবা, লো এন্দ ওর্দরগী ফীভম ফত্তনা লৈরিবা লমদম অমদা ইকোনোমিগী ফীভম ফগৎলকপা, চাওখৎ-মায়কৈদা চঙশীল্লকপা হায়বসিদি কৈদৌনুংদা ওইথোক্লরোইদবা অমনি হায়খি।ঈরাং অসীগী মমাঙদা ষ্টেট অসীদা চহী খূদীঙগী টুরিষ্ট লাখ ১.৭ হেন্না লাক্লম্বনি অদুবু ঈরাং অসী লাকখ্রবা মতূঙদদি হৌজিক টুরিষ্ট লাকপগী চাং অসী খম থেংনা হন্থখিবনা রেভিন্যু কারকখিদ্রে হায়না চিফ মিনিষ্টরনা নুঙাইতবা ফোঙদোকখি। থৌরমদুদা ৱা ঙাঙবদা মনিপুরগী গভর্নর অজয় কুমার ভাল্লানা হায়, টুরিষ্টশিং মরাঙ কায়না চঙলকপগী থৌওং অসী মনিপুরগী মহৌশাগী ফজরবা শক্তম অসীখক্না লাকপনি হায়বসু য়াদ্রি। অতোপ্পা লৈবাকশিংদগী লাক্লিবা লমকোয়বশিং অদুদা ঐখোয়না য়াম্না নুংশিবা অমসুং ঈকায় খুম্নবগা লোয়ননা তরাম-তরাম্না লোয়নদুনা পেলহন্নবা হোৎনবা হায়বসি য়াম্না মরূওইবা অমনি হায়না ফোঙদোকখি।

মতম অমদা মিজোরামদগী হেন্না চহী খূদিংগী টুরিষ্ট লাক্লম্বা মনিপুরনি অদুবু হৌজিক্তি মিজোরাম্লোমদা মমায় ওন্সীনখ্রে। ঈরাং লৈতবা, পীকখ্রবা ষ্টেট অমা ওইরিবা সিক্কিমদা চহী খূদিংগী টুরিষ্ট লাখ ১৭ হেন্না লাকপা মরম্না টুরিজম সেক্টরদগী লূপা ক্রোর কয়ামরুম কারক্লি হায়বা ৱাফম লুচিংবা অনীনা ফোঙদোকখি।