মনিপুরগী ইস্যুশিং অসীগী ৱায়োয়শিন পুরক্নবা ঙসীফাওবদা বি জে পিনা করি তৌখ্রবগে: লোকেন

মনিপুরদা রুলিং পার্টি অমা ওইনা লৈঙাক সাসনগী চূপ্লী পায়রিবা বি জে পিগী থৌমীশিং অমসুং লুচিংবা খরা অসীনা ষ্টেট অসীদা চহী কয়াগী মমাঙদগী মায়োক্নদুনা লাক্লিবা ইস্যুশিং অসিগী ৱারোয়শিন পুরকপদি লায়রদনা হেন্না হেন্না পাকথোক-চাউথোরক্তুনা নোংমা কাংদনা মীশী-মীনা, মীকপ-মীরাওখোলনা নিল্লে হায়না কংগ্ৰেস লুচিংবা দা. লোকেন্না অকনবা ৱাফম থমখ্রে।
ঙসীদি ঈরমদম মনিপুর ভূৎ-প্রেৎকি, শাহীঙ চাবশিংনা খূৎলীংবা, আইন লৈত্রবা, অকনবনা অচূম্বা শকপা লমদম অমা ওইরক্লি। মতু শোনবা, সঙ্গ লৈতবা, লায়রবা মীয়াম্নি হৌজিক শিরিবা মীচমশিং অসী। লমদমসিদা মীয়ামগী পুন্সি কনবিনবা কনাসু লৈত্রে, মীচম মীয়াম্না মশা-মশাগী থৱায় হিংননবা হোৎনবদা নোংমগী শিন্থা কাউনরে। অসিগুম্বা প্রলয়গা চপ মান্নরবা তাঞ্জা অসীদা মনিপুরগী বি জে পিগী লুচিংবনি, থৌমীনি হায়রিবশিং অসীনা মখোয়গী সেন্টরদা লৈরিবা মমীৎ লাওবা, মনাতোন শাংবা লুচিংবশিং অদুগী মরুমদা ৱা ঙাঙদুনা মনিপুরগী মীয়াম অপঙবনি মতাগুম, মীয়ামগী ইহুল খঙনা সেন্টরনা থবক তৌরক্লগনি হায়জীনবগী হৈনবি অমা লৈরি। সেন্টরদা লৈরিবা বি জে পিগী লুচিংবশিংনা মনিপুর মীয়ামগী ইহুল খঙনা থবক তৌরক্লগনি, মীয়াম্না পাম্লিবা দিমান্দশিং থবক্তা ওন্থোরক্লগনি হায়রিবসি চহী কয়া কয়াগী মতমদগীনি অদুবু ঙসীফাওবা সেন্টরগী বি জে পিনা মনিপুর মীয়ামগী অপাম্বা করিগুম্বা অমা ফাওবা থবক ওইনা পায়খৎলকপদি লৈত্রি হায়না সগোলবন্দ এ সিগী হান্নগী এম এল এসু ওইরিবা দা. কে ঐচ লোকেন্না ফোঙদোকখি।
সগোলবন্দ ব্লোক কংগ্ৰেস কম্মিটিনা শীন্দুনা ঙরাং “নো এন আর সি, নো সেন্সস”, রেষ্টোর পিচ এন্দ নোর্মেলসি, রিসেট্টলমেন্ট ওফ আই দি পি, ফ্রী মুভমেন্ত, নো বফর জোন, প্রোটেক্ট নেস্নেল হায়ৱে, য়ুনাইট মনিপুর, সেভ মনিপুর হায়বা খোল্লাউগা লোয়ননা সগোলবন্দ থিঙোম লৈকায় কম্যুনিটি হোলদা চত্থখিবা ৱাকৎ মীফম অমদা দা. লোকেন্না ৱাফম অসী ফোঙদোকখিবনি।
এন আর সি অপদেট তৌদনা সেন্সস তৌবা য়ারোই হায়না মীয়াম্না চঙশীল্লক্লিবা ঈহৌ অসীগী মতাঙদা মনিপুর লৈঙাক অমসুং সেন্টরদা লৈরিবা বি জে পিনা লুচিংবা লৈঙাক্কি অশেংবা ফিরেপ অদূ লাউথোক্তুনা মীয়ামদা খঙহনগদবনি হায়না মহাক্না ফোঙদোকখি।