সেন্সস য়ৈথোক্কনি হায়বগী ওর্দর আগষ্ট ৩১ ফাওবদা থোক্ট্রবদি পূঙ ২৪ গী জেনরেল ষ্ট্রাইক চত্থরগনি: জে এফ দি

কুমশিং ১৯৫১ দা বেজ ইয়ার ওইরগা নেস্নেল রেজিষ্টর ওফ সিটিজন্স (এন আর সি) অপদেট তৌদ্রিবফাওবা সেন্সসকি থবক-থৌরমশিং য়ৈথোক্লে হায়বগী ওর্দর অমা ষ্টেট লৈঙাক অসীগী মায়কৈদগী আগষ্ট ৩১ ফাওবদা থোকপা ঙমদ্রবদি কেম্পেইন ফোর জষ্ট এন্দ ফ্যের দিলিমিটেসন (জে এফ দি) না মীয়ামগী মতেঙগা লোয়ননা আগষ্ট ৩১ গী অহীং নোংয়াইদগী মথঙ নুমিৎ সেপ্তেম্বর ১ গী অহীং নোংয়াই মতমফাওবা, পূং ২৪ গী জেনরেল ষ্ট্রাইক অমা মনিপুর পূম্বদা চত্থরগনি হায়না জে এফ দিগী কনভিনর জিতেন্দ্র নিঙোম্বনা লাউথোকখ্রে।

ঙরাং ইম্ফাল ইষ্ট দিষ্ট্রিক্টকি ৱাংখৈ সোইবম লৈকায়দা লৈবা সিটিজন্স ক্লবতা পাঙথোকপা পাউমীশিংগা উনবগী থৌরম অমদা জিতেন্দ্র নিঙোম্বনা ৱাফম অসী ফোঙদোকখিবনি। মীয়াম অমসুং জে এফ দিগী থৌমীশিংনা এন আর সি অপদেট তৌদ্রিফাওবা সেন্সসকি থবক পায়খৎপা য়ারোই হায়না অকনবা খোঙজঙ চঙশীল্লকপদগী চিফ মিনিষ্টর, হোম মিনিষ্টর অমদি অতৈ এম এল এশিং দিল্লিদা চত্তুনা সেন্টরগী লুচিংবা কয়াগা উনরবসু ঙসীফাওবা এন আর সি অপদেট তৌদ্রিফাও সেন্সস পাঙথোকখিরোই, য়ৈথোক্কনি হায়বা ৱাফম অমত্তা ফোঙদোরকপা লৈত্রি। মসীমক য়াম্না লাইবক থীবনি হায়না জীতেন্দ্রনা থমখি।

সেপ্তেম্বর ২, ৩ অমসুং ৭ তা চত্থগদৌরিবা ষ্টেট এসেমব্লীগী মীফম অসীদা এন আর সি অপদেট তৌদ্রিফাওবা সেন্সস য়ৈথোক্নবা হাওসনা ৱারেপ লৌগদবনি। সেপ্তেম্বর ৭ তা “নো এন আর সি, নো সেন্সস” কি চপচাবা ৱারেপ লৌব্রা হায়বদু য়েংশিনবগী খোঙজঙ অমা মীয়াম্না চঙশীনগনি হায়খি। ৱারেপ অসী সেপ্তেম্বর ৭ ফাওবদা এসেমব্লিনা পাস তৌদবা তারবদি নুমিৎ অদূমক্তদগী মনিপুর পূম্বদা মতম কক্তনা জেনরেল ষ্ট্রাইক চত্থরগনি হায়বা ৱাফম জীতেন্দ্রনা লাউথোকখি।