ফীভম হেন্না শোকচীল্লক্লিবা লোক্টাক পাৎ তা শাগৎনরক্লিবা হোম-ষ্টেশিং মীৎয়েঙ চঙবা মথৌ তারক্লি

অৱাং নোংপোক ইন্দিয়াদা খ্বাইদগী চাউরবা, থুমহী চেন্দবা পাৎ অমা ওইরিবা মনিপুরগী বিষ্ণুপুর দিষ্ট্রিক্টকি মনূঙচন্না লৈরিবা লোক্তাক পাৎ অসীগী মনূঙ অমদি অকোয়বগী ফীভম নোংমা-নোংমগী শোকচীল্লকপা থেংনরি। পাৎ অসীদা লোগী ৱাংমদা চল্লাইরিবা মশীং য়াম্লবা হোম-ষ্টে কয়া অসী মরী লৈনবা অথোরিটিনা অথূবা মতমদা মীৎয়েং চঙদুনা তকথোকপগী তঙায়ফদবা লৈরি।
হৌখিবা চহী ২/৩ লোমগী মতমসিদা লন্নাই মীওই অমদি ওর্গানাইজেসন কয়ানা লমদমসিগী পুৱারিগা শাগোন্নদুনা লাক্লবা তাঙলবা পাৎ অসীদা ফ্লোটিং হোমষ্টে কয়া চল্লাইদুনা লম কোয়বশিংগী পূক্নিং চিংশিন্ননবা, শেন্দাল লম্বী অমা ওন্থোক্নবা থবক পায়খৎনরক্লি। য়াম্না ঙক্লিবদি হোমষ্টেশিং অসী লৈঙাক অমদি মরী লৈনবা অথোরিটিশিংগী অয়াবদি অমত্তা য়াওরমদ্রে। থৌওং অসীনা মরম ওইদুনা ঐখোয়গী তাঙলবা লন ওইরিবা লোক্টাক পাৎকি অকোয়বগী খলদা অচৌবা শীঙনবা অমা ওইরক্লে। অসীগুম্বা, লোক্টাক পাৎকি মনূঙ অমসুং অকোয়বগী খলদা অমাঙ-অতা থোকহনগদবা থবক-থৌরমশিংদি লৈঙাক্না অয়াবা অমত্তা পীরোইদবনি অদুগা পাৎ অসীদা শাগৎলক্লিবা ষ্ট্রকচরশিং অসী লৈঙাক্না খূদক্তা তকথোকফম থোকপনি হায়না মায়কৈ কয়াদগী ফোঙদোক্নরক্লি।
মালেমগী ওইনা লৈরিবা তাঙলবা ৱেটলেন্দশিং কন্ননবা, য়োকখৎতুনা থম্নবগীদমক য়ুনেস্কোগী মখাদা হৌখিবা কুমশিং ১৯৭১ দা মালেমগী লৈবাকশিংগী মরক্তা য়ান্ন-চেরোল খূৎয়েক পীনদুনা ১৯৭৫ দগী রামসর কনভেন্সন চৎনবা হৌখিবনি। কুমশিং ১৯৯০ গী মার্চ ২৩ দগী লোক্টাক পাৎ অসীসু রামসর সাইট অমা ওইনা শকখঙদুনা লৈরকখ্রবনি। মনিপুর লৈঙাক্নসু পাৎ অসীগী মনূঙদা অথাফূম শেমগৎপা, ফূমশঙনচিংবা শাজিনবা য়ারোই হায়না ওর্দর থোকপসু লৈখ্রবনি।