লমদমসিদা তঙদূ-লৈতাবা পুরক্নবা, খুন্নাইগী মায়োক্তা লৈরিবা খূৎলায় পায়বা লমহেন-তুহেনবশিং মপূঙফানা লাকশীন্ননবা পান্দমদা ষ্টেট অমসুং সেন্ট্রেল সেক্যুরিটি ফোর্সনা চীঙগী শরূকশিং, চীঙখোঙগা তাইনবা তম্পাক্কি মফম কয়াদা সর্স ওপরেসনশিং চত্থদুনা আইনগী ৱাংমদা খূৎশু-খূৎলায় পায়বা মীওইশিং, খূৎলায়শিংগা কোন্ননা ফাগৎপগী থবক অকনবা মওংদা চত্থদুনা লাক্লি।
লালহৌলূপ কয়াগী কেদরশিং নোংমা কাংদনা ফাগৎপগী মথক্তা মফম কয়াদা মখোয়না পৈশিন্দুনা থম্লম্বা খূৎশু-খূৎলায়শিংসু লেপ্তনা ফাগৎলক্লি। মসীগী মখা তারকপা খোঙথাঙ অমদা ঙরাংসু ইম্ফাল ৱেষ্ট দিষ্ট্রিক্টকি মনূঙচন্না লৈরিবা ফয়েং অপূনলোক তুরেল মপান্দা কম্বাইন ফোর্সনা সর্স ওপরেসন চত্থবদা য়াম্লবা খূৎশু-খূৎলায়শিং ফংবা ঙমখ্রে।
লমশাং পুলিস ষ্টেসনগী মনূঙচন্না লৈরিবা মফম অদুদা মেগজিনগা কোন্ননা সি এম জি কার্বাইন অমা, মেগজিন য়াওবা মোদিফাইদ থ্রী নোদ থ্রী রাইফল অমা, মেগজিনগা কোন্নবা তোঙান তোঙানবা মখলগী পিষ্টোল ৭, সিঙ্গল বেরেল ৫, দব্বল বেরেল নোংমৈ অমা অমসুং হেন্দ গ্ৰেনেদ অমা রিকোভর তৌরে হায়না মনিপুর পুলিসকি পাউ অমদা ফোঙদোরক্লি। মনিপুর পুলিস অমসুং অতৈ সেন্ট্রেল সেক্যুরিটি ফোর্সনা মখাতানা থিবা-হূম্বগী থবকশিং চত্থখিগনি হায়বা ৱাফমসু থম্লক্লি।