মনিপুরদা য়ূমকোক অমদি মীকোক থীবগী থবক থৌরমশিং পায়খত্রিঙৈদা নেস্নেল রেজিষ্টর ওফ সিটিজন্স (এন আর সি) হান্না অপদেট তৌদুনা মীরৈবাকমচাশিং হান্না খন্দোক্কদবনি হায়বা দিমান্দ তৌরদুনা লমদম অসীগী মীয়াম্না চঙশীন্দুনা লাক্লিবা খোঙজঙ অসী শোয়দনমক মায় পাকপা য়াবগী মওং অমা উবা ফংলে। হীরম অসীগী মতাঙদা য়ুনিয়ন হোম মিনিষ্টরগা হকথেংননা উনদুনা য়াম্না কূপ্না খন্ন-নৈনরুরে হায়না মনিপুরগী হান্নগী চিফ মিনিষ্টর নোংথোম্বম বীরেননা ফোঙদোকখ্রে।
ঙরাং অয়ূক দিল্লিদগী হল্লকখিবা হান্নগী চিফ মিনিষ্টর অসীনা ইম্ফাল ইন্টর্নেস্নেল এয়রপোর্ট তা ৱাফম অসী পাউমীশিংদা ফোঙদোকখিবনি। হৌজিক মনিপুরদা ওইরক্লিবা এন আর সিগী ঈহৌ অসীগী মতাঙদা ৱারী শান্নজগে হায়বদা হোম মিনিষ্টর অমিট শাহানা হরাওনা য়াবিরকপদগী চৎলিবা আগষ্ট থা অসীগী ১৭ তা উনদুনা কূপ্না ৱারী শানখি হায়বা ৱাফম বিরেন্না পাউমীশিংদা ফোঙদোকখি।
কুমশিং ২০২৩ গী ফেব্রুয়ারি থাদা মনিপুর লৈঙাক্না এন আর সি তৌননবা সেন্টরদা তকশীনখিবা, সেন্টরনসু ৱাফমদু খন্নবা লৈরে হায়না পাউখুম পীরকখিবা, কুমশিং ২০২৪ দা মনিপুর লেজিসলেটিব এসেমব্লি দা এন আর সি অপদেট তৌননবা ৱারেপ লৌখিবা অমদি হীরম অসীগী মতাঙদা হৌজিক মীয়াম্না অকনবা খোঙজঙ চঙশীল্লিবা কয়া অসীগী মতাঙদা মরীক চুম্না পাউদমখি হায়না বিরেন্না পাউমীশিংদা ফোঙদোকখি। মীয়ামগী অপাম্বা অসী চপচানা থবক্তা ওন্থোক্নবা হোৎনগনি হায়না অমিট শাহানা ফোঙদোরকখি হায়বা ৱাফম হান্নগী চিফ মিনিষ্টর এন বিরেননা মখাতানা ফোঙদোকখি।